اَئید ءِ روچ ءَ بلوچستان ءِ جتا جتائیں ھنداں بی وائی سی ءِ سروکانی دزگیر کنگ، پولیس ءِ زوراکی ءُ زوریں بیگواھیانی بگیری ءَ زھرشانی روانک کشگ بیتگ.
بنشون ءِ رد ءَ مرچی بی وائی سی ءِ سروکانی دزگیر کنگ ءِ بگیری ءَ پنجگور، نوشکے ، کوھلو، مستونگ، ھزدار، کلات ، ھاران، واشک، ھب چوکی، ملیر کراچی، تربت، بلیده، تمپ، آواران، جاھو، چاگے، نوکنڈی، دشت، دالبندین، چارسر، ماشکیل ءُ مچ ءَ ھوار بازیں ھنداں زھرشانی روانک کشگ بیتگ.
زھرشانی روانکاں جنین ءُ زھگاں ھوار سیاسی ءُ چاگردی کارکناں ھم بازین کچے ءَ بھر زرتگ. زھرشانی کنوکاں بی وائی سی ءِ سروکانی اکس ءُ پلی کارڈ دست ءَ بیتگ ءُ اوگام جتگ. آیاں پاکستانی ریاست ءُ پولیس ءِ زوراکی ایر جتگ اَنت ءُ ڈاکٹر ماه رنگ، سبگت الله شاه جی ءُ سمی دین ءَ ھوار بی وائی ءِ آدگه سروک ءُ کارکنانی یل کنگ ءِ لوٹ کرتگ.
