شال: بلوچ ڈاکٹر پورم ءِ جارکش ءَ ماں رسانکدرءَ وتی شنگ کرتگیں درشانے ءَ گوشتگ کہ بلوچستان ءَ زوریں بیگواھی ءُ ڈاکٹرانی گون ءَ زوراکی کنگ ءِدرچ ءَ اوپار نہ کن ایں۔ گوستگیں شپ ءَ مکران میڈیکل کالج ءِ ٹیچر ڈاکٹر سنا اللہ بلوچ ءُ پائنل ایئر ءِ نودربر آپتاب بلوچ درکانودی چہ گس ءَ آوار جنگ بیتگ۔ بلوچ ڈاکٹر پورم ایشی گوں ترندیں دانکاں ایر جنت۔
آئی ءَ گوشتگ کہ اے بنداتی ویل نہ اِنت ۔ پہ بلوچ ءِ پجار ءَتیوک ءَ وانندگیں بھرگ یکشل ءَ ریاستی زوراکیانی نشانگ بوگ ءَ اَنت۔ ڈاکٹر ماہ رنگ بلوچ پیسر ءَ زندانی اِنت، نوید بلوچ کہ سوابی میڈیکل کالج ءِ پرسٹ ایئر ایم بی بی ایس ءِ نودربر اِنت کہ 25 مارچ ءَ زور بیگواہ کنگ بیتگ ءُ نوں دگہ یک بلوچ ڈاکٹرے ءُ مکران میڈیکل ءِٹیچر سنا اللہ گوں کھول ءِ آدگہ مردماں زور بیگواہ کنگ بیتگ۔ دوشی آئی گس ءَ بیڑ برگ ءِ میان ءَ نہ تیوک ءَ موبائل پون پلگ بیتگ اَنت بلکیں جنین ءُ زھگ کمشرپ کنگ بیتگ اَنت اے یک رستری ءُ زوراکی یے۔
جارکش ءَ گوشتگ کہ ریاستی ادارہ وتی شونداتانی پارست ءَ بلوچستان ءِ جاوراں گیشتر ناگیگ کنگ ءَ اَنت۔ لس بلوچانی بنکی انسانی پادمال کنگ دودے جوڑ بیتگ، چوش کہ سکا بژنیگ ءُ ایرجنگی اِنت۔
آئی ءَ وتی درشان ءِ گڈی ءَ گوشتگ کہ ڈاکٹر ماہ رنگ بلوچ، ڈاکٹر سنا اللہ،ڈاکٹر آپتاب بلوچ، نوید ءُ آدگہ درسیں بیگواھیں مردم زوت یل کنگ بہ بنت۔ بلوچ ڈاکٹر ءُ آدگہ مردمانی ترسینگ ءِ درچ بند کنگ بہ بیت۔
