پنجگور | کراچی: چه بلوچ یکجھتی کمیٹی ءِ نیمگ ءَ ڈاکٹر ماه رنگ ءُ بی وائی سی ءِ کارکنانی دزگیر کنگ ءِ بگیری ءَ پنجگور ءُ کاٹھور ءَ زھرشانی روانک کشگ بیتگ.
پنجگور ءِ ھند ھدابادان ءَ ڈاکٹر ماه رنگ، سمی دین ءُ بیبو بلوچ ءِ دزگیر کنگ ءِ بگیری ءَ روانک چه مواچ بازار ءَ درکپتگ ءُ شھدگ ءَ مچ بیتگ. روانک ءَ جنین ءُ زھگاں ھوار مردمانی بازیں کچے ءَ بھر زرتگ.
زھرشانی کنوکاں گوشتگ که ریاست ءَ جنین نشانگ کرتگ ءُ دزگیر کرتگ اَنت ، اِے ریاست ءِ پروش ءِ منانک اِنت. اگاں ما مرچی اِے زوراکیانی بگیری ءَ گھگیری مه کن اِیں گڑا باندا دگه بازیں بلوچ بندیگجاھاں بند کنگ بیت.
آیاں گوشتگ که ریاست شال ءَ یکشل ءَ زوراکی کنگ اِنت که ما ایشی ءَ ایر جن اِیں، ما تچک ءَ گوش اِیں دانکه مئے رھشون یل کنگ نه بنت ءُ آیانی سر ءَ دروگیں کیس ھلاس کنگ نه بنت مئے جھد برجاه بنت.
دومی نیمگ ءَ چه بلوچ یکجھتی کمیٹی ءِ نیمگ ءَ کراچی ءِ ھند کاٹھور ءَ بی وائی سی ءِ رھشونانی دزگیر کنگ ءُ ریاست ءِ زوراکیانی بگیری ءَ زهرشانی روانکے کشگ بیتگ ، روانک ءَ جنین ءُ زھگان ھوار بازیں کچے ءَ مردماں بھر زرتگ۔ زھرشانی ءَ چہ کراچی ءَ 27 پروری ءَ پاکستانی لشکر ءِ دست ءَ زور بیگواھیں سرپراز الی ء نواز الی ءِ کھول ھم گوں بیتگ۔
