بلوچ نیشنل موومنٹ ( بی این ایم ) ءَ بلوچستان ءَ انسانی ھکانی پادمال کنگ ءُ شال ءَ ریاستی زوراکیانی بگیری ءَ لندن ءَ 10 ڈاؤننگ اسٹرٹ ءَ زھرشانی کرتگ۔ زھرشانی ءَ بلوچستان ءِ سرجمیں جاوراں ابید بی ایس او آزاد ءِ سرکماش زاھدبلوچ ءُ کمک کارمستر اسد بلوچ ءِ یازده سال زوریں بیگواھی بابت ءَ تران کنگ بیتگ. زھرشانی کنوکاں زاھد بلوچ ءِ برات شاھجان ءِ چه ریاست ءِ نیمگ ءَ کوش گوں ترندیں دانکاں ایر جتگ.
زھرشانی کنوکاں بلوچستان ءَ پاکستان ءِ ریاستی ناشرکاری پدّر کرتگ اَنت ءُ گوشتگ که انوں بلوچستان چه ترندیں زوراکیانی میان ءَ گوزگ اِنت ، چی ءَ که پاکستانی لشکر ءُ آئی ءِ سلاه بندیں کشنده ٹولی ھمک وھد ءَ بلوچ راج ءَ زوراکیانی آماچ کنگ ءَ اَنت. آیاں گوشتگ که پہ بی ایس او آزاد ءِ سرکماش زاھدبلوچ ءِ 11 سال زوریں بیگواھی ءِ سرجم بوگ ءَ زھرشانی کنگ بوگ ءَ اِنت بلے چه بدبھتی ءَ ھپتگے پیش آئی ءِ برات شاھجان کرد ھم پاکستانی لشکر ءَ شھید کرتگ. دژمن ھمے سرپد بوتگ که گوں اِے زوراکیاں زاھد بلوچ ءَ نزور کرت کنت۔
زھرشانی کنوکانی گوشگ اِنت که دومی نیمگ ءَ وتگڑیں سرکار ءَ سرپراز بگٹی ءِ سروکی ءَ بی وائی سی ءِ کارکنانی سر ءَ اُرش کرتگ، چه ایشی ءَ بازیں کارکن شھید ءُ ٹپی بیتگ اَنت. چه ایشی ءَ پد ریاست ءَ وتی برجاھیں زوراکیانی میان ءَ ڈاکٹر ماه رنگ ءِ ھواری ءَ بی وائی سی ءِ سروک بندیگ کرتگ اَنت.
زھرشانی ءَ بی این ایم ءِ بنجاھی سروک ءُ زور بیگواھیں زاھد بلوچ ءِ برات، بی این ایم ءِ باسک سلیم الاھی ءَ تران کرتگ. آئی ءَ وتی برات ءِ زوریں بیگواھی ءُ مارچ 2025 ءَ وتی دومی برات شاھجان ءِ ناھکیں کوش ءِ بابت ءَگپ جتگ، آئی ءَ گوشتگ که اِے دیمونی په بلوچستان ءِ آجوئی ءَ اَنت ءُ چه اے جھد ءَ پدکنز ءَ نه باں۔
زھرشانی ءَ بی این ایم ءِ بنجاھی کستریں سر کارگشاد ھسن دوست بلوچ، دری کارانی کارگشاد پھیم بلوچ ، بی این ایم یوکے ھنکین ءِ سدر ماسٹر منزور بلوچ، بی آر پی یوکے ءِ سدر منسور بلوچ، بلوچ راجی زرمبش ( بی آر زیڈ ) ءِ سروک ابدالله سیاهوئی ، بی ایچ آر ءِ کورشید بلوچ، ورلڈ سندھی کانگریس ءِ کامران جتوئی ، جمشید امیری ، منزور ھاجی ھسین ، اھمد ابدالھمید ، ھکیم بلوچ ءُ جاسم بلوچ ءَ ھم تران کرتگ.
