بلوچ نیشنل موومنٹ ( بی این ایم ) ءَنیدرلینڈز ءِ شھر ایمسٹر ڈیم ءَ پاکستان ریاست ءِ نیمگ ءَ بلوچ یکجھتی کمیٹی ءِ سروک ڈاکٹر ماہ رنگ بلوچ، بیبگر بلوچ ءُ آدگرانی دزگیری ءُ لٹ شاپ کنگ ءِ بگیری ءَ زھرشانی کرتگ۔
زھرشانی ءَ پشتون تھپز موومنٹ ( پی ٹی ایم ) ءِ کارکناں بھر زرتگ۔ زھرشانی کنوکاں چہ بلوچستان ءَ زور بیگواھیں مردمانی اکس ءُ پلے کارڈ گوں بیتگ ءُ آیانی سر ءَ انسانی ھکانی لگتمالی نبشتہ بیتگ۔ آیاں گوشتگ کہ چنچو سال اِنت بلوچستانءَ ریاستی زوراکی وتی گڈی سیمسر ءَ سر بیتگ۔
زھرشانی کنوکاں گوشتگ کہ شال ءَ پاکستانی لشکر ءَ بلوچ یکجھتی کمیٹی ءِ پر ایمنیں روانک ءُ زھرشانی ءِ سر ءَ تیرگواری کرتگ ءُ لٹ شاپ کرتگ کہ چہ اییشی ءَ سے مردم شھید ءُباز ٹپی بیتگ ، سدانی کچ ءَ زھرشانی کنوکیں مردمانی ھواریءَ بلوچ یکجھتی کمیٹی ءِ سروک ڈاکٹر ماہ رنگ بلوچ، بیبگر بلوچ ءءُ آدگہ سروک دزگیر کرتگ اَنتءُ چیریں جاھے ءَ بندیگ کرتگ اَنت کہ آیانی ھال ءُ اھوال بوگ ءَ نہ اِنت۔
آئی ءَ گوشتگ کہ بلوچستان ءَ گوستگیں چنچو دھک اِنت کہ ریاستی زوراکی ءُ زوریں بیگواھی ءِ درچ برجاہ اِنت۔ ایشی آسر ءَ ھزارانی کچ ءَ بلوچ ورنا ءُ لس مردم زور بیگواہ کنگ بیتگ اَنت۔ اے مردمانی بابت ءَ ھچ وڑیں ھال نیست ءُ آیانی کھولاں ھم آیانی بابت ءَ ھچ وڑیں سرپدی دیگ ءَ نہ اَنت۔
ھھمے وڑ ءَ پشتون راج ھم چہ ریاستی زوراکیاں نہ رک اتگ۔ پشتون تھپز موومنٹ ( پی ٹی ایم ) ءِ نیمگ ءَ ھمے زوراکیانی بگیری ءَ توار چست کنگ ءِ سر ءَ ریاستی لشکرءُ لشکری ادارھانی دست ءَ زوراکیانی دیمپان بوگ ءَ اَنت۔اے وھد ءَ پی ٹی آئی ءِ سروک الی وزیر ءُ آدگہ بندیگجاھاں بندیگ اَنت، آیانی توار ءِ دارگ جھد کنگ بوگ ءَاِنت۔پشتون ھنداں زوریں بیگواھی، زوراکی ءُ ریاستی زور ءِ چکاسگ دودے جوڑ بیتگ ءُ مردمانی زھرشانیاں پہ زور ھلاس کنگ ءَ اَنت۔
آئی ءَ گوشتگ کہ گوں درسیں انسانی ھکانی ادارہ ءُ شرپمندیں جھان ءَ لوٹ کن ایں کہ آ بلوچ ءُ پشتون چکچینی ءِ بگیری ءَ توار چست بہ کن اَنت۔
زھرشانی ءَ بلوچ نیشنل موومنٹ نیدرلینڈز ءِ سرکماش مھیم ابُدرھیم، کمک سرکماش وھید بلوچ، ڈاکٹر ابُدالتیپ بلوچ، ماھرہ بلوچ، رکیہ بلوچ، واھد بلوچ، نبیل بلوچ، پشتون تھپز موومنٹ ( پی ٹی ایم ) ءِ کارکن زر ھان آپریدی، جمال بلوچ، شاری بلوچ ءُ مھمد بلوچ ءَ تران کرتگ۔
