بلوچ راج ءِ بنجاھی جارکش ءَ وتی شنگ کرتگیں درشانے ءَ گوشتگ کہ پنجاپ پولیس ءَ تونسہ شریپ ءَ زھرشانی کنوکیں مردم چہ زھرشانی کنگ ءَ پیش دزگیر کرتگ اَنت اے مردمانی آجوئی ءِ سر ءَ پابندی جنگ ءَ پدر کنت۔ پنجاپ پولیس ءِ ڈیرہ جات ءَ بلوچ راج ءِ گون ءَ رویشت کینگداری اِنت۔ مرچی بلوچ یکجھتی کمیٹی ءِ جار ءَ تونسہ شریپ ءِ مردم پہ زھرشانی کنگ ءَ مچ بوگ ءَ بوتگ اَنت کہ پولیس ءَ چل ءَ گیش مردم دزگیر کرتگ ءُ بیگواہ کرتگ۔
آئی ءَ گوشتگ کہ پنجاپ پولیس ءِ رویشت بلوچ راج ءِ گون ءَ ایردست ءُ زورگری ءِ اِنت۔ وتی آجوئی ءِ گپ ریاست ءِ نیمگ ءَ ھمک شھری ءِ ھک اِنت۔ بلوچ یکجھتی کمیٹی ءِ روانک ءَ بگر داں انوں پنجاپ پولیس ءَ درزنانی کچ ءَ ایپ آئی آر زھرشانی کنوکانی بگیری ءَ نبشتہ کرتگ ءُ جتائیں ھمبل دزگیر کنگ بوتگ اَنت۔
آئی ءَ وتی درشان ءِ گُڈی ءَ گوشتگ کہ ما گوں بلوچ راج ءُ مردمی ھکانی جھگیر ءُ گلاں لوٹ کن ایں کہ پنجاپ پولیس ءِ اے رویشت ءِ بگیری ءَ چنچو بوت کنت توار چست بہ کن اِت ءُ پر ایمنیں شھریانی آجوئی ءِ جھد ءَ برجاہ بدار اِت۔
