شال: بلوچ یکجھتی کمیٹی ءِ بنجاھی سروک ڈاکٹر ماہ رنگ بلوچ ءِ گھار پہ آئی چارگ ءَ زندان ءَ شتگ گڑا آئی ءَ گوں وتی گھار ءَ تران کرتگ ءُ گوشتگ کہ پہ مئے ترسینگ ءَ ھرپیمیں جھد کنگ بوگءَ اِنت، بلے مارا چہ وتی ھک ءُ انساپ ءِ جھد ءَ پد کنز بوگی نہ اِنت۔ مئے توان گوں مئے ھم سنتی ءُ ایمنیں گھگیری ءَ بندوک اِنت۔
آئی ءَ پہ راج ءَ کلوہ داتگ ءُ گوشتگ کہ مئے جھد پہ ھک ءُ انساپ ءَ اِنت۔ مارا یکجاہ بوگ ءُ ایمنیں جھد ءَ توار چست کنگ لوٹ ایت دانکہ جھان مئے ھکی ئیں لوٹاں سرپد بہ بیت۔ زوراکی کنگ ءَ ابید مارا نزور بوگی نہ اِنت چی ءَ کہ ھمک دیمونی مئے منزل ءَنزیک کنگءَ اِنت۔
آئی گھار ءِ گوشگ اِنت ڈاکٹر ماہ رنگ زندان ءَ چہ انچو جنجال ءَ ابید انگت ءَ مھکم بیتگ، چہ آئی دروشم ءَ ھچ وڑیں بے اوستی گندگ نہ بیتگ۔ آئی کندگ ءُ مھکمی ھمے گپ ءِ گواھی ءَ دے اَنت کہ آ چونیں ھم زوراکی ءِ دیم ءَ نزور نہ بیت۔
