ڈاکٹر نسیم ، بلوچ راجی زْرمبشت ( بی این ایم ) ءِ سرکماش ءَ ، سندی ، بلوچ ءُ پشتونانی میان ءَ ھم سنتی ءِ سر ءَ زور دیان ءَ گْوشتگ مارا تیوک ءَ گوں زبان ءُ گپ ءُ تْرانانی تہ ءَ گوں یک دومی ءَ یکجھتی کنگی نہ اِنت بلکیں گامگیج ھم زیرگی اِنت۔ آئی ءَ گْوشتگ ، سدھاں سالاں مئے پیریناں دری الگاریانی دیم داشتگ ءُ گوں زوراکاں جنگ کرتگ۔چہ برتانیا ءِ واکداراں بہ گراں داں پیسرگیں شھنشاھاں ، گوں ھما مردماں کہ آیاں چہ مئے واھگ ءَ ڈن مئے سر ءَ واکداری ءِ کوشست کرت۔ مروچی ما اے جھد برجاہ داشتگ۔ ءُ انچوش کہ پیسرگیں شھنشاہ گار ءُ گور بوت اَنت ، ھمے پیم پاکستان ھم گمسار بیت۔
اے گپ آئی ءَ ماں جنیوا ءَ جھانی سندی پتر (ورلڈ سندھی کانگریس ) ءِ چیردستی ءَ سندکانپرنس 2025 ءِ نیاد ءَ تْران کنان ءَ گْوشتگ اَنت۔
آئی ءَ ھمک جھانی پتر ءِ سر ءَ پجیگ ءَ توار چست کنگ ، جھانی تْرامگیجانی دیم ءَ پاکستان ءِ زوراکیاں پدر کنگ ءُ ھم کوپگے ءَ اوشتگ ءِ ارزشت ءِ سر ءَ گپ جنان ءَ درائینتگ مئے جھد ایوک ءَ پہ زمین ءُ مڈیاں نہ اِنت۔ اے پہ منگہ ، مزدانک ءُ آجوئیں راجے ءِ بستار ءَ ھست بیگ ءِ اگبال ءِ بارہ ءَ اِنت۔
آئی ءَ گوش داروک دلگوش پرینتگ اَنت ءُ گْوشتگ پاکستان چہ 1947 ءَ مئے سر ءَ منڈگ بیتگ ، بلے مئے پیر ءُ کماش چہ ھزاراں سالاں پیش ھمد ءِ نندوک اَنت ءُ چہ پاکستان ءِ روگ ءَ پد ھم ما ھمد ءَ مان ایں۔
سند ءِ رنج ءُ جیڑھانی سر ءَ گپ جنان آئی ءَ گْوشتگ سندی زبان ءُ ربیدگ ءِ گار کنگ ءِ کوشست بیگ ءَ اِنت ، سندی راجی کارکن زور بیگواہ کنگ بیگ ءَ اَنت ءُ سند گزرانکی تک ءَ انگر کنگ بیتگ۔ بلوچستان ءُ سند ءِ سر ءَ بیوکیں زوراکی ناگتیں نہ اَنت بلکیں شر جیڑگ ءُ جوڑ کنگ بیتگیں شوندات ءِ بھر اَنت۔
ڈاکٹر نسیم ءَ پہ گڈی ڈاہ ءَ ، یک مشتی ءَ جھد کنگ ءِ دزبندی کرتگ ءُ چہ بلوچ ، سندی ءُ پشتون راجاں پہ گھگیری ءَ یکجاہ بیگ ءِ لوٹ کرتگ ، انچیں گھگیری ءُ زرمبشتے کہ آئی ءِ لوٹ چہ پاکستانی نوک آبادی واکداری ءَ سرجم ءَ آجوئی بہ بیت۔
بی این ایم ءِ سرکماش ءَ چہ میان راج ءَ لوٹ کرتگ کہ آ زیت گامگیج بہ زیر ایت ، پاکستان ءِ جنگی میارانی سر ءَ پٹ ءُ پول بہ کنت ، راجانی سنت ءُ میان راجی مزدھیں آمیدگس ءَ پاکستان ءِ جست ءُ پرس کنگ ءُ داں ھما وھد ءَ پاکستان ءِ لشکری ءُ گزرانکی کمکانی دارگ داں مردمی ھکانی لگتمالی ءَ بہ دار ایت ، آئی ءَ پاکستانی لشکر ءُ سرکاری واکدارانی سر ءَ پابندی جنگ ءِ ھم لوٹ کرتگ ، ھما پاکستانی لشکر ءِ سروگان ءُ سرکاری اگدہ دار کہ جنگی میارانی تہ ءَ گون اَنت۔
’’ اے تیوک ءَ لوٹ نہ اَنت— اے پہ میانراج ءَ چکاس اَنت کہ باریں آ پہ وتی راھبنداں اوشت ایت کہ کہ آیانی منوگری ءِ ٹاپار ءَ جنت یا ناں ، ڈاکٹر نسیم ءَ گْوشتگ ’’ ءُ چہ سندی ، بلوچ ءُ پشتوناں ما ھمے گْوش آں : مئے باریگ اتکگ ۔‘‘
