بلوچ وومن پورم بنجاھی جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ 21 مارچ 2025 ءَ شال ءِ سریاب دگ ءَ بلوچ یکجھتی کمیٹی ءِ باسک ءُ زوربیگواھیں مردمانی کھولانی سر ءَ پولیس ءِ زوراکی ءَ سَے مردم شھید ءُ باز ٹپی بوتگ۔ بی وائی سی ءِ سروک ءُ کارکنانی دزگیر کنگ ءِ بگیری ءَ زھرشانی ءِ میانءَ پولیس ءَ مردمانی ترسینگ ءَ ارسی گیس جتگ ءُ مردم لٹ شاپ کرتگ ءُ آپ جتگ اَنت۔ چہ ایشی سوب ءَ باز جنین ءُ مردین ٹپی بوتگ اَنت ھمے میان ءَ پولیس دگہ مردم دزگیر کرتگ ءُ برتگ اَنت۔
آئی گوشتگ کہ زھرشانی کنوکاں شھیدانی لاش زرتگ ءُ سریاب دگ ءَ زھرشانی ءَ نشتگ ءُ انساپ ءِ لوٹ کرتگ بلے ریاست ءَ گوں آیاں زوراکی کرتگ سھب ءَ مھلہ ءَ کھولاں ھوار ڈاکٹر ماہ رنگ ءُ آدگہ زھرشانی کنوک دزگیر کرتگ ءُ تانہ ءَ برتگ اَنت ءُ اود ءَشھیدانی کھولانی سر ءَ سکا زوراکی کرتگ کہ اے بژنی گپے۔
آئی گوشتگ کہ ریاست ھرچ جیڑہ ءِ گیش ءُ گیوار ءَ گوں زوراکی ءَ کنگ لوٹ ایت۔ بلکیں زھرشانی کنوک تیوک ءَ پہ وتی مردمانی آجوئی ءِ لوٹ ءَ کنگ ءَ اَنت۔ آیاں چہ مھلوک ءَ لوٹ کرتگ کہ آ اے زوراکی ءِ بگیری ءَ توار چست بہ کن اَنت ءُ گوں زھرشانی کنوکاں بوشت اَنت۔
آئی گوشتگ کہ بلوچ وومن پورم زوربیگواھیں مردمانی کھولاں ھوار بی وائی سی ءِ بنجاھی سروکانی آجوئی ءِ لوٹ کنت۔ دزگیر کرتگیں مردم زوت ءَ چہ زوت یل کنگ بہ بنت۔
