شال: زورگریں پاکستانی لشکر ءَ مرچی سھب ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءَ بیڑ برتگ ءُ بلوچ یکجھتی کمیٹی ءِ سروک ڈاکٹر ماہ رنگ ءَ ھوار باز مردم آوار جنگ ءَ پد بیگواہ کرتگ۔
بنشون ءِ رد ءَ زورگریں پاکستانی لشکر ءَ بیڑ برگ ءِ میان ءَ جنین ءُ زھگ ھم لٹ شاپ کرتگ اَنت ءُ زی چہ پولیس ءِ تیرگواری ءَ بیران بیتگیں مردمانی لاش کہ پہ زھرشانی ءَ ایر بیتگ اَنت پاکستانی لشکر ءَ لاش ھم گوں وت برتگ اَنت۔
مرچی سھب ءَ شال ءَ زھرشانی نندا ک ءِ سر ءَ پاکستانی لشکر ءِ بیڑ برگ ءُ ڈاکٹر ماہ رنگ ءُ آدگہ مردمانی آوار جنگ ءِ گپ بلوچ یکجھتی کمیٹی ءَ راست کرتگ ءُ گوشتگ کہ پاکستانی لشکر ءَ مرچی سھب ءِ پنچ ءُ نیم ءَ زھرشانی نندانک ءَ بیڑ برتگ ءُ بی وائی سی ءِ سروک ڈاکٹر ماہ رنگ ءَ ھوارباز مردم گراں کنگ ءَ پد آوار جتگ ءُ گوں وت برتگ اَنت۔
چوش کہ گوستگیں روچ ءَ بلوچ یکجھتی کمیٹی ءِ سروک بیبرگ ءُ آئی برات ءَ ھوار ڈاکٹر الیاس ءُ پہ آدگہ بیگواھیں مردمانی زوریں بیگواھی ءِ بگیری ءَ بلوچ یکجھتی کمیٹی ءِ نیمگ ءَ زی شال ءَ زھرشانی کنگ بیتگ اَت کہ پاکستانی لشکر ءَ زھرشانی ءِ سر ءَ اُرش کرتگ اَت سے مردم ھبیب، امداد ءُ نیامت شھید کرتگ اَنت ءُ دگہ باز مردم ٹپی بیتگ اَت۔ بلوچ یکجھتی کمیٹی ءِ سروک ڈاکٹر ماہ رنگ گوں شھیدانی لاشانی ھواری ءَ سریاب دگ ءَ زھرشانی ءَ نشتگ اَت کہ مرچی سھب ءَ بی وائی سی ءَ سریاب دگ ءَ برما ھوٹل ءِ دیم ءَ سھب ءِ دہ ءَ شھیدانی جنازہ ءِ نماز ءِ وانگ ءِ جار جتگ اَت ءُ اے زوراکی ءِ بگیری ءَ سرجمیں بلوچستان ءَ ھرتال ءِ جار پرینگ بیتگ اَت۔
