اسلام آباد ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءِ سروک ڈاکٹر ماہ رنگ ءَ ماں چاگردی رسانکدر ایکس ءَ بلوچستان ءَ برجاھیں زھرشانیانی پژدر ءَ نبشتہ کرتگ کہ انچوش زور ءُ آزار کارمرز کرتگ ءُ ریاست ءَ اے زرمبشت ءِ ھلاس کنگ ءِ جھد کرتگ چہ ایشی ءَ باز گیش گوں ترندی ءَ اے زرمبشت شھر، میتگ ءُ دمکانی تہ ءَ چست بوگ ءَ اِنت۔
آئی ءَ گوشتگ کہ زرمبشت ءِ سیمی پیز ءِ پارست ءَ تیوگیں ڈیھ ءَ زھرشانیانی درچ برجاہ اِنت۔ مرچی بلوچستان ءِ پنچ مزنیں شھر پنجگور، سوراب، کلات، منگوچر ءُ مستونگ ءَ زھرشانی روانک کشگ بوتگ کہ ھزارانی کچ ءَ مردم دگانی سر ءَ در کپتگ اَنت ءُ اے زرمبشت ءِ پلہ مرزی اِش کرتگ۔ مردمانی گھگیری زندگ بات ءُ مردمانی جھد زندگ بات۔
