شال: بلوچ یکجھتی کمیٹی ءِ نیمگ ءَ زھرشانی روانک ءِ سیمی پیز ءَ زھرشانیانی درچ ءَ سے شمبے ءِ روچ ءَ پنجگور، سوراب، کلات، منگچر، مستونگ ءُ گْوادر ءَ زھرشانی کنگ بوتگ۔
زھرشانیاں زور بیگواھیں مردمانی کھول، نودربر، سیاسی ءُ چاگردی کارکن، جنین ءُ زھگاں ھوار جتائیں بھرگاں سیادی داورکیں مردماں بھر زرتگ۔
زھرشانیاں ھواریں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت۔ زھرشانی کنوکیں مردماں اسلام آباد ءَ بلوچ چکچینی ءِ بگیری ءَ برجاھیں زھرشانی نندانک ءَ پلہ مرزی ءُ لشکر ءِ زوراکیانی بگیری ءَ اوگام جتگ۔
آیاں تران کرتگ ءُ گوشتگ کہ بلوچستان ءَ پہ زوریں بیگواھی ءِ بگیری ءَ زھرشانی کنگ نوکیں گپے نہ اِنت، اے زھرشانیاں سکا دیر اِنت کہ بلوچستان ءِ جتاھیں ھند ءُ دمگانی تہ ءَ یکشل ءَ برجاہ اَنت۔ بلے پہ اے جیڑہ ءِ گیش ءُ گیوار کنگ ءَ ریاست ءِ نیمگ ءَ انگت ءَ ھچ وڑیں گامگیج زورگ نہ بوتگ۔
آیاں گوشتگ کہ زوریں بیگواھی ءِ ھواری ءَ چنچو سال اِنت بلوچستان ءَ زوربیگواھیں مردم دروگیں میڑاں کشگ بوگ ءَ اَنت۔ اے ھما مردم اَنت کہ آیانی زوریں بیگواھی ءِ کیس ھم جتائیں جاھاں یاداشت کنگ بوتگ اَنت۔ ایشی یک منانکے ھمیش اِنت بالاچ آمیدگس ءَ پیش کنگ بیت ءُ رند ءَ انگت ءَ گوں دگہ سے مردمانی ھواری ءَ دروگیں میڑاں کشگ بیت۔
آیاں گوشتگ کہ پہ بلوچ چکچینی ءِ بگیری ءَ یک زھرشانی روانکے چہ کیچ ءَ درکپتگ ءُ جتائیں ھند ءُ دمگاں ترّ ءُ گرد کنگ ءَ پد اسلام آباد ءَ شتگ۔ چہ آیانی گپانی گوش دارگ ءَ ابید بیگواھیں مردمانی کھول مدام زوراکیانی نشانگ کنگ بنت۔
