شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5762 روچ سرجم بیتگ۔ یک شمبےءِ روچ ءَ چہ شال ءَ سیاسی ءُ چاگردی کارکن نورمھمد بلوچ، پیز مھمد بلوچ، ازیز بلوچ ءُ آدگہ مردم پہ ھمدردری درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ راجی مارشت یک راستی یے اے ھرھساب ءَ منگ لوٹ ایت۔ بلے ریاست پہ ایشی ھلاس کنگ ءَ بلوچستان ءَ زوراکی کنگ ءَ اِنت۔ ایشی ءِ تہءَ زوریں بیگواھی ءُ ژانگولیں لاشانی دزکپگ ھوار اَنت۔ اے وڑیں گامگیج ریاستی زوراکی زانگ بیت۔
آئی ءَ گوشتگ کہ بلوچستان ءَ مچی سزا ءِ پارست ءَ نہ تیوک ءَ بلوچ سیاسی کارکن بلکیں زور بیگواھیں مردمانی کھول ھم نشانگ کنگ بوگ ءَ اَنت۔ گوستگیں روچ ( 15 مارچ 2025 ) ءَ زر بیگواھیں بلوچ نودربر سروک زاھد بلوچ ءِ برات شاہ جان کرد ھم ھمے ناشرکاراں کشتگ کہ ریاست آیانی سروکیءَ کنگ ءَ اَنت۔ زاھد بلوچ گوستگیں پانزہ سال اِنت کہ زور بیگواہ اِنت نوں آئی کھول ھم نشانگ بوگ ءَ اِنت۔
