بلوچ یکجھتی کمیٹی ءِ سروک ڈاکٹر ماه رنگ بلوچ ءَ وتی شنگ کرتگیں درشانے ءَ گوشتگ که مرچی ھزدار ءِ ھند نال ءَ چہ یازده سالاں زوربیگواھیں زاھد بلوچ ءِ برات شاھجان بلوچ کشگ بیتگ، شاھجان بلوچ نه چونیں ھم سیاسی گلانی گون ءَ بندوک بیتگ ءُ نہ سیاسی ءُ انسانی ھکانی کاراں ھوار بیتگ. آ یک کار ءُ باری مردمے بیتگ ءُ وتی کھول ءِ والینوک بیتگ. آئی میار تیوک ءَ ھمے بیتگ که آ رھشونیں نودربر سروکے ءِ برات بیتگ که ھمے نودبر سروک ءَ یازده سال اِنت پاکستانی چیریں ادارھانی بندیگ جاھاں بند اِنت.
آئی ءَ گوشتگ که بلوچستان ءِ سرکار انسانی ھکانی لوٹوک ءُ آئی ءِ لیکھانی بگیری کنوکانی کشگ ءَ اَبید آیانی کھول ءِ ھما مردم که آ سیاست ءُ انسانی ھکانی ھچ وڑیں کاراں ھوار نه اَنت آیاں ھم نشانگ کنگ اِنت. شاھجان ءِ کیس ءَ ھوار اِے وڑیں زوراکیانی سدانی کچ ءَ کیس ءِ منانک مئے کر ءَ ھست۔
ڈاکٹر ماه رنگ بلوچ ءَ گوشتگ که بلوچستان ءَ گوستگیں دو دھکاں چوشیں روچے نه گوستگ که مئے آزیز زور بیگواه کنگ، درکانودی کشگ ءُ نشانگ نه بیتگ اَنت. مرچی سرجمیں بلوچستان ءَ چوشیں گسے نیست که آ چه زوراکیاں سانمند مہ بیت. ھمک گس ءُ ھمک کھول سانمند اِنت ، بلے بلوچاں ابید دگہ کسے ءَ اِے زوراکی گندگ ءَ نہ ایت۔
آئی ءَ گوشتگ که بلوچستان ءَ اِیوک ءَ 2025 ءِ اولی سئیں ماھاں سے درجن ءَ گیش مردم درکانودی کشگ بیتگ اَنت. مرچی ھم ھزدار ءِ ھند نال ءَ شاهجان بلوچ نامیں ورنایے نشانگ کنگ ءُ کشگ بیتگ.
ڈاکٹر ماه رنگ ءَ گوشتگ که چه ایشی ءَ ابید ما بس ایرجنی درشان شنگ نه کرتگ بلکیں اِے زوراکی ءُ بے راھبندی ءِ بگیری ءَ زھرشانی کرتگ ءُ انساپ لوٹ اِتگ. چے ءَ که ما زان اِیں ایرجنگ بس په پیشدارگے نیکہ په اِے دیریگیں جیڑھانی گیش ءُ گیوار کنگ ءُ نه په راستیں انساپ ءِ دیمروی ءَ اِنت، بلکیں په اِے ڈیھ ءِ توانمندیں سروکانی دیم سپاھی دیگ بنیادے۔ چوش که سروک راھبند، مردمگری ءُ انسانی ھکانی پروا ءَ نه دار اَنت ءُ وتی پروش ءَ زوراکیانی ایر جنگ ءِ پردگ ءِ پشت ءَ چیر دے اَنت۔
آئی ءَ گوشتگ وھدے که راھبندانی سر ءَ کار کنگ ءُ پسّو دیگ وتی راستیں دروشم ءَ بندات به بیت ھچ کسی سر ءَ زوراکی کنگ نه بیت. بلے اِد ءَ انساپ دیگ ءِ جاه ءَ ھرکس ءَ ایر جن اَنت که جیڑھ گندگ مه بنت ءُ ریاست وتی نزوریاں چیر به دنت۔
ڈاکٹر ماه رنگ ءَ گوشتگ که چه ایشی ءَ ھوار گوں بلوچ راج ءَ دزبندی کن آں که ڈن ءَ نشتگیں مردمانی گپ ءَ مہ کپ اَنت کہ آ ھجبر بلوچ راج ءِ سر ءَ زُلم ، زوراکی، کُشت ءُ کوش ءُ لٹ ءُ پل ءَ نہ گندگ اَنت ، آ نه ایوک ءَ وتی جھد ءِ دربرگ ءِ راھاں شون دیگ ءَ اَنت بلکیں پرمائشی ایرجنگ ءِ لوٹ ءَ ھم کنگ ءَ اَنت.
آئی ءَ گوشتگ که مئے مستریں توان ءُ توکل بلوچستان ء ھما مردم انت که آ مدام چه ھمے گپ ءَ ترسگ ءَ انت که سھب ءَ وھدے که چه گس ءَ در کپ اَنت شپ ءَ په سلامتی واتر بنت یا نه. اگاں مھکم اشتوک به به اِیں گڑا دنیا مئے ایمنیں جھد ءِ منگ ءَ لاچار بیت. ایرجنگ بس یک کسانیں پسّو اِنت ، مئے مستریں مول ءُ مراد انساپ ءُ بدلی آرگ اِنت ، په ایشی ءَ ما بائد اِنت که وت وتی راه ءَ گچین به کن اِیں نیکہ ھما مردم که مئے جیڑھاں ھچ نک سرپد اَنت.
