بلوچ آجوئی لوٹوکیں سروک رھیم بلوچ ایڈوکیٹ ءَ ماں رسانکدر ءَ وتی شنگ کرتگیں درشانے ءَ گوشتگ کہ ریاست ءِ سروکی ءَ جوڑ کنگ بیتگیں سلاہ بندیں ٹولی ءِ دست ءَ نال، ھزدار ءَ شاہ جان بلوچ ءِ نشانگ کنگ ءُ کشگءَ گوں ترندیں دانکاں ایر جن آں۔ شھید شاہ جان بلوچ پاکستانی لشکر ءِ دست ءَ چہ 2014 ءَ بیگواھیں بلوچ سروک ءُ بی ایس او آزاد ءِ پیشیگیں سرکماش زاھد بلوچ ءِ برات اِنت۔
آئی ءَ گوشتگ کہ شاہ جان بلوچ ءِ کوش ھمے گپ ءَ پیش دار ایت کہ بلوچ راجی آجوئی زرمبشت ءِ سیاسی، سپارتی، دودمانی ءُ لشکری پڑ ا یکشل ءَ چست بوگ ءِ سوب ءَ زورگریں پاکستان ریاست گوستگیں دو دھک اِنت چہ برجاھیں وتی رستری شوندات ءَ گیشتر تیز کنگ ءُ پہ زور بلوچ راج ءُ راجی زرمبشت ءَ دارگ لوٹ ایت۔ جھان ءِ گوستانک گواہ اِنت کہ زورگر ءُ زوراکیں توانمندانی ءُ ایردستیں راجانی آجوئی زرمبشت ءِ گیشءُ گیوار مدام گیشتریں زوراکیانی تہ ءَ گندگ بیتگ اَنت، بلے ایشی ءِ آسر ءَ زورگر ءُ زوراکاں پروش وارتگ۔ زورگریں ریاست پاکستان ءِ سرکار زور ءِ کارمرز کنگ ءَ ابید پہ بلوچ ءِ آجوئی زرمبشت ءِ گیش ءُ گیوار ءَ دگہ ھچ نہ جیڑ اَنت۔ زورگریں ریاست ءُ آئی ھندی کمکار چنچو زوراکی بہ کن اَنت بلے پہ آجوئی ءَ بلوچ راجی ارادہ ءِ دیم ءَ پروش ھمایانی بیت۔
رھیم ایڈوکیٹ ءَ گوشتگ کہ من لشکری کونسل ءِ باسکاں ھوار گل، اکوام متھدہ ءُ زورگپتیں بلوچستان ءِ ھمساھگیں ڈیھانی گون ءَ لوٹ کن آں کہ آ دیم ءَ بیا اَنت ءُ بلوچ چکچینیءِ دارگ ءُ پہ بلوچستان ءِ آجوئی ءَ وتی کرد ءَ پیلو بہ کن اَنت۔
بلوچ سروک ءَ گوشتگ کہ من گمانی اےگرانیں ساھت ءَ گوں شھید شاہ جان بلوچ ءِ کھول ءِ گماں شریدار آن ءُ گوں پاکیں ھاوند ءَ دوا اِنت کہ شھید ءَ باگیں بھشت ءَ جاگہ بہ دنت ءُ کھول ءَ سبر ءُ اوپار کنگ ءِ ھاٹیگ ءَ بہ دنت۔
