شال: پاکستانی لشکر ءِ دست ءَ زور بیگواھیں پھیم اھمد ء سئید اھمد ءُ ھادم الی ء الی اھمد ءِ کھول ءَ شال پریس کلب ءَ پریس کانپریس کرتگ ءُ گوشتگ کہ پھیم اھمد ءُ ھادم بلوچ دوئیں انٹرمیڈیٹ ءِ نودربر اَنت آ گوستگیں شپ ءَ چہ سمنگلی دگ جناہ ٹاؤن ءَ ادار یک ءَ آوار جنگ بیتگ اَنت، چہ ایشی ءَ پد سرجمیں کھول گوں جنجالاں دیمپان اِنت۔ کسے ءِ کسانیں چیزے بیگواہ بہ بیت آ تکانسر بیت مئے زھگ بیگواہ کنگ بیتگ اَنت۔ بلوچستان ءَ زوریں بیگواھی سکا مزنیں جیڑھے چوشیں گسے پشت نہ کپتگ کہ گوں ھمے درد ءَ دیمپان نہ اِنت۔ بلوچستان ءَ ھمک روچ دگانی سر ءَ زھرشانی کنگ بوگ ءَ اِنت بلے چہ سرکار ءِ نیمگ ءَ انگت ءَ ھچ وڑیں دلجمیں گامگیج زورگ بوگ ءَ نہ اِنت۔ زور بیگواھیں مردمانی دروگیں میڑ ءَ کشگ ءِ درچ برجاہ اِنت، چہ ایشی کھول جنجال اَنت۔
آئی ءَ گوشتگ کہ مھمد پھیم ءُ ھادم الی کسانیں زھگ اَنت آیانی مردمگری ءِ بنیاد ءَ زوت یل کنگ ءِ لوٹ ءَ کن ایں، اگاں اے زھگ چونیں ھم میارباری ءَ ھوار اَنت گڑا آمیدگس ءَ پیش کنگ بنت دانکہ ما وتی زھگانی میار ءَ بہ زان ایں آمیدگس ءُ کانود مارا اے ھک ءَ دے اَنت۔ مئے زھگ زوتاں چہ زوت آجو کنگ بہ بنت ءُ اے رمزان ءِ ماہ ءَ ما چہ اے رنجاں کشگ بہ بہ ایں۔
آئی ءَ گوشتگ کہ مئے زور بیگواھیں مردمانی کھولانی نیمگ ءَ منگوچر ءَ شھدگ ءِ سر ءَ زھرشانی نندانک برجاہ اِنت ءُ مرچی سھب ءَ نندانک جاہ ءَ ریاستی ادارہ ءُ پاکستانی لشکر ءِ کارمنداں سھبی ارش کرتگ ءُ مئے کھول ترسینتگ اَنت ءُ زھگانی آجوئی ءَ ابید ھادم ھسین ءِ برات کدرت اللہ زور آوار جتگ ءُ دو ادار ءَ آزار دیگ ءَ پد یل داتگ۔
آئی ءَ گوشتگ کہ ما ریاست ءُ انتزامیہ ءَ تچکی ءَ گوش ایں دانکہ مئے زھگ آجو نہ بیتگ اَنت ما منگوچر ءَ وتی زھرشانی نندانک ءَ برجاہ دار ایں ءُ گیشتر ترند کن ایں۔ ما انتزامیہ ءَ یک روچے ءِ وھد ءَ دے ایں اگاں مئے زھگ آجو نہ بوت اَنت ما وتی زھرشانی ءَ گیش کن ایں ءُ تھتگ بند ھرتال کن ایں۔
