بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءَ پاکستانی لشکر ءِ جنگی بندیگانی یل کناھینگ ءَ 48 ادار ءِ وھد داتگ اَت چوش کہ پہ زورگریں لشکر ءَ وتی کارمندانی زندگی ءِ رکینگ ءَ گڈی موہ اَت۔ پد ءَ ھم پاکستان ءَ وتی دودمانی نابودی ءُ لشکری تونگری پیش داشتگ ءُ نہ تیوک ءَ پہ سنگینی گپ ءُ تران ءَ وت ءَ دور داشتگ بلکیں چہ زمینی راستی ءَ وتی چم بند کرتگ اَنت۔ زورگریں لشکر ءِ چہ اے تونگری ءِ آسر ءَ درسیں بندیگ 214 پاکستانی لشکر ءِ کارمند کشتگ اَنت۔
آئی ءَ گوشتگ کہ بی ایل اے ءَ مدام جنگی راھبندانی رد ءَ کاروائی کرتگ، بلے پاکستان ریاست ءَ پہ وتی کارمندانی زندگیءِ رکینگ ءَ ابید جنگ کنگ لوٹ اتگ۔ اے وتسری ءِ آسر ءَ دژمن ءِ 2014 لشکری کارمند کشگ بیتگ اَنت۔
جارکش ءَ گوشتگ کہ بی ایل اے ھمے جنگ ءَ وتی دوازدہ سرمچاراں آیانی شھیدی ءَ ستک شانی ندر کنت کہ آیاں دژمن ءِ بگیری ءَ بے مٹیں دیمونی داتگ۔چارشمبے ءِ شپ ءَ سے سرمچار، گوستگیں شپ ءَ دگہ چار سرمچار دژمن ءِ گون ءَ میڑ ءَ شھید بیتگ۔ اے شھیدانی تہ ءَ پنچ مجید برگیڈ ءِ پدائی ھم ھوار بیتگ اَنت آیاں وتی جان ءِ دیمونی داتگ ءُ دژمن یک انچیں پروشے داتگ گوستانک ءِتہ ءَ مدام گیر آرگ بیت۔
آئی ءَ گوشتگ کہ درہ ء بولان جنگ ءِ پدائیاں دژمن یک انچیں تباہ کنوکیں دامے ءَ اڑینتگ ءُ تاوان داتگ ، پدائیاں لھتیں بندیگ لشکری کارمند جتائیں بوگیانی تہ ءَ بند کرتگ ءُ سنگر گپتگ، آدگہ بندیگانی سرمچاراں وتی مھکمیں بندراں برگ ءَ سوبین بیتگ اَنت ءُ وھدیکہ پاکستانی ایس ایس جی کمانڈو زرار شرکت جاپر ایکسپریس ءِ بوگیانی تہ ءَ پہ نندیگانی درکنگ ءَ سر بیتگ اَنت گڑا پدائیاں آیان ءَ انگر کرتگ ءُ آیانی سر ءَ ترندیں ارش کرتگ۔ داں چنچو اداراں برجاھیں اے میڑءَ ایس ایس جی کمانڈواں بازیں کچے ءَ تاوان بیتگ۔ ھمے بندیگ کشگ بیتگ اَنت۔ پدائیاں داں گڈی تیر ءَ جنگ کرتگ دژمن ءَ یک مزنیں تاوانے داتگ ءُ وتی گڈی تیری ءَ شھیدی گچین کرتگ۔
جارکش ءَ گوشتگ کہ نوں زورگریں لشکر ھمے پدائیانی لاشاں پہ وتی سوبمندی ءَ پیش کنگ ءِ بے سوبین جھدے کنگ ءَ اِنت ، آیانی ارادہ زند ءَ واتری ءَ ابید داں گڈی دمان ءَ مڑگ بیتگ۔ لشکر چہ وتی درسیں لشکری ءُ چیریں واکاں ابید بندیگانی رکینگ ءَ بے سوب بیتگ۔ دیمترءَ ھما مردم کہ آیانی پاکستان ریاست وتی کمکاری ءَ پیش دارگ ءَ اِنت آ درسیں مردم چہ بنداتی روچ ءَ بی ایل اے ءَ چہ وتی جنگی راھبندانی رد ءَ چہ مھکمیں راہ ءَ دیم داتگ اَنت۔
آئی ءَ گوشتگ کہ اے جنگ انوں ھلاس نہ بیتگ بلکیں ترند بیتگ۔ بلوچ سرمچار جتائیں ھنداں سنگر گرگ ءُ زورگریں لشکر ءَ یکشل ءَ نشانگ کنگ ءَ اَنت ءُ دژمن داں انوں وتی مرتگیں کارمندانی لاشانی کشگ ءَ بے سوب بیتگ۔ ھمک گوزوکیں دمان ءَ بی ایل اے ءِ توان گیشتر گندگ بوگ ءَ اِنت۔
جیھند ءَ گوشتگ کہ بی ایل اے درہ بولان آپریشن ءِ بابتءَ ھالاں آپریشن ءِ سرجم بوگ ءَ پد رسانکدر ءَ شنگ کنت، جنگ انگت ءَ برجاہ اِنت۔
