بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ که بلوچستان ءِ دمگ کیچ ءَ پاکستانی لشکر ءَ دگه دو بلوچ ورنا درکانودی کشتگ.
آئی ءَ گوشتگ که زوریں بیگواھی ءَ پد سکا آزار دیگ ءُ بلوچ ورنا ءُ تیوک ءَ گونڈلانی تچک ءَ پاھو دیگ ءِ درچ یکشل ءَ برجاه اِنت. بلوچستان ءِ ھند کیچ ءَ دو ژانگولیں لاش دزکپتگ که آیانی ته ءَ آزارانی نشانی گندگ بیتگ اَنت.
جارکش ءَ گوشتگ که نزام بلوچ ء الی بلوچ ریاستی جوڑکرتگیں کشنده ٹولی ءَ 11 مارچ ءِ شپ ءَ چه گلی بلیده ءَ زور بیگواه کرتگ اَت. چه ایشی ءَ کھول ءَ ھندی پولیس تھانه ءِ گون ءَ آئی ءِ بیگواھی ءِ بابت ءَ گپ کرتگ ءُ چار مردم ءِ نام داتگ اَت. بلے دومی روچ ءَ آئی ءِ ژانگولیں لاش دزکپتگ کہ بازیں آزارانی نشانی گندگ بیتگ اَنت.
آئی ءَ گوشتگ که ھمے وڑ ءَ شاھنواز ء ھیات بلوچ کیچ ءِ ھند تمپ گومازی ءِ جاه منند اِنت که تچک ءَ ریاستی کشنده ٹولی ءِ دست ءَ نشانگ کنگ بیتگ. تمپ گومازی ءَ یکیں ماه ءَ اِے سئیمی کسان سالیں زھگ اِنت که نشانگ کنگ بوگ ءَ اِنت.
جارکش ءَ گوشتگ که انوں زوراکی گیش بوتگ اَنت ءُ بلوچ چکچینی برجاہ اِنت۔ایشی ءِ بُنکی مول زانتکاریں بلوچ ورنا اَنت. اِے زوریں بیگواھی ، آزار ءُ درکانودی کوش میان استمانی کنونشنز ءِ بگیری اِنت. ما گوں میان استمان ءُ انسانی ھکانی ادارھاں لوٹ کناں که آ زوت گامگیج بزور اَنت ءُ چه انسانی تباھی ءِ رکینگ ءَ دزمانجنی به کن اَنت.
