بلوچ ریپبلکن گارڈز ءِ جارکش دوستین بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که مئے سرمچاراں سے جتائیں کاروائیاں سھبت پور ءَ دگ کارکنوکیں شرکت ءِ مشین ءُ گاڑی تیرگواری کرتگ ءُ تاوان داتگ اَنت، ڈیره بگٹی ءَ گیس ءِ پائپ لائن گوں تراکناکیں شورھاں تباه کرتگ ءُ ڈیره مراد جمالی ءَ بند ساچی شرکت ءِ ایکسیویٹر گوں بمب تراک ءَ تباه کرتگ.
آئی ءَ گوشتگ که 11 مارچ ءَ بی آر جی ءِ سرمچاراں دیگر ءِ وھد ءَ سھبت پور ءِ گور ناڑی ءِ دگ جوڑ کنوکیں شرکت ءِ سر ءَ تیرگواری کرتگ ءُ کارکنوکیں گاڑی ءُ مشین سکا تاوان داتگ انت.
جارکش ءَ گوشتگ که دومی نیمگ ءَ 12 مارچ ءِ شپ ءَ مئے سرمچاراں ڈیره بگٹی ءِ ھند سوئی ءِ نزیک ءَ دولی ءَ چه سوئی ءَ دیم په پنجاپ ءَ روکیں 36 انچ پائب لائن گوں تراکناکیں شورھاں تباه کرتگ.
آئی ءَ گوشتگ که ھمے شپ ءَ بی آر جی ءِ سرمچاراں ڈیره مراد جمالی ءَ ھادی بکش ھوٹل ءَ بند ساچی شرکت ءِ یک ایکسیویٹر مشین گوں تراکناکیں شورھاں تباه کرتگ.
دوستین بلوچ ءَ اُرشانی زمه واری من اتگ ءُ گوشتگ که اے وڑیں کاروائی داں بلوچستان ءِ آجوئی ءَ برجاه بنت.
