شال : پہ زور بیگواھیں مردمانی پد جنگ ءَ شدکشیں زھرشانی گدان ءَ 5750 روچ سرجم بیتگ۔ چارشمبےءِ روچ ءَ بی ایس او پجار ءِ کمک سرکماش ڈاکٹر تارک بلوچ، جے بلوچ ءُ نیشنل پارٹی ءِ بلوچستان ءِ کارگشاد چنگیز بلوچ ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان ءَ بلوچستان دستیگ کرتگ ءُ ھما وڑ کنگ ءَ اِنت کہ زورگریں ریاست گوں وتی زورگپتیں ھنداں کن اَنت۔ زوریں بیگواھی، ژانگولیں لاشانی چگل دیگ، سیاسی کارکن ءُ نودربرانی نشانگ کنگ ءُ آبادیانی سر ءَ بیڑ برگ پاکستانی لشکر ءِ نیمگ ءَ بلوچستان ءَ دودے جوڑ بیتگ۔
آئی ءَ پہ وی بی ایم پی ءِ زھرشانی گدان ءِ بابت ءَ تران کرتگ ءُ گوشتگ کہ اے گدان پہ زور بیگواھیں مردمانی آجوئی ءُ درکانودی کشگ بیتگیں مردمانی کھولانی گون ءَ پہ انساپ ءَ پچ کنگ بیتگ۔
ماما کدیر گوشتگ کہ چہ 2000 ءَ داں انوں ھزارانی کچ ءَ بلوچ زور بیگواہ کنگ بیتگ اَنت۔ آیانی تہ ءَ بیست ھزار دزگیر بیتگیں مردم کشگ بیتگ اَنت۔
