مردمی ھکانی ادارہ ایمنسٹی انٹرنیشنل زِرباری ایشیا ءَ ماں رسانکدر ءَ وتی شنگ کرتگیں درشانے ءَ گوشتگ کہ پاکستان ءَ بالاچ مولابکش ءِ درکانودی کوش ءِ پژدر ءَ 6 دسمبر 2023 ءَ چہ بلوچستان ءِ شھر تربت ءَ داں اسلام آباد ءَ آتکگیں روانک ءِ سروکی ءَ جنین ءُ زور بیگواھیں مردمانی کھول کنگ ءَ اَنت۔ اسلام آباد ءَ سر بوگ ءَ پد زھرشانی کنوکاں گوستگیں شانزہ روچ اِنت کہ زھرشانی ءَ نشتگ اَنت۔
آئی ءَ گوشتگ کہ بیگواھی مردمی ھکانی بگیری اِنت۔ ایشی ءِ ھواری ءَ آیانی زندگی ءُ آجوئی آیانی کھولانی مالی ءُ چاگردی ھک اِنت۔ھمود ءَ کہ مردم زور بیگواھی ءِ آماچ بنت گڑا چہ ایشی ءَ اود ءِ مردم کھول سانمند بنت۔ ایمنسٹی رپورٹ ءَ ”Living Ghosts“ ھوار کنگ بوتگ۔
آئی ءَ گوشتگ کہ زور بیگواہ کنگ بوتگیں مردمانی کھول پہ وتی آزیزانی بارو ءَ تچکی ءَ گپ کن اَنت گڑا بیھار دیگ بنت۔ بلوچانی روانک ءَ ھواریں مردم، چہ ایشی ءَ پیش پولیس ءِ زوراکی، آوارجنی ءُ آزارانی آماچ اَنت۔ ایمنسٹی ءَ چہ ایشی پیش وتی رپورٹ ” بریونگ دی سٹارم“ ءَ زور بیگواھیانی بگیری ءَ زھرشانی کنوکیں مردمانی جنجال نبشتہ کرتگ اَنت۔
ایمنسٹی انٹر نیشنل ءَ گوں پاکستان سرکار ءَ لوٹ کرتگ یکے زوریں بیگواھی ھلاس کنگ ءُ زور بیگواھیں مردم زوت یل کنگ بہ بنت یا آیانی سلامتی ءُ جاھانی بارو ءَ گوشگ بہ بیت۔
آئی ءَ گوشتگ کہ دومی اے گپ ءِ دلجمی دیگ بہ بیت کہ سانمند ءُ زور بیگواھیں مردمانی کھول ھچ وڑیں جنجالانی دیمپان کنگ نہ بنت ءُ کھول کمک کنگ بنت ءُ آیان ءَ زھرشانی کنگ ءِ ھک دیگ بیت، زور بیگواھیں مردمانی بارو ءَ پٹ ءُ پول کنگ بیت۔
ایمنسٹی انٹر نیشنل ءَ وتی درشان ءِ گُڈی ءَ گوشتگ کہ مئے گل بلوچستان ءَ زوریں بیگواھیانی بگیری ءَ برجاھیں زرمبشت ءِ دیم ءَ آتکگیں جنجالانی ھلاس کنگ ءَ میان استمان ءِ زوت دلگوش گور کنگ ءِ لوٹ ءَ کنت۔
