بلوچ یکجھتی کمیٹی ءِ سروک ءُ زور بیگواھیں ڈاکٹر دین مھمد ءِ جنک سمی دین ءَ ماں رسانکدر ءَ وتی درشانے ءَ گوشتگ کہ ھب بوانی ءَ زور بیگواھیں یاسر ءُ جنید ءَ ھوار آدگہ بیگواھیں مردمانی کھولاں گوستگیں چار روچ اِنت کہ زھرشانی نندانک ءَ نشتگ اَنت۔
آئی ءَ گوشتگ کہ سانمندیں کھول بیست روچ ءَ پیش ھمے جاہ ءَ داں سے روچ ءَ زھرشانی ءَ نشتگ ءُ دگ اِش بند کرتگ اَت، ایشی آسر ءَ انتزامیہ ءَ گپ ءُ تران ءَ پد داں بیست روچ ءِ تہ ءَ زور بیگواھیں مردمانی آجوئی ءِ سدکی داتگ اَت۔ انگت ءَ سرکار وتی داتگیں کول ءِ پیلو کنگ ءَ بے سوب بیتگ۔ چہ ایشی ءَ پد کھول لاچار بیتگ ءُ یک رندے پد ءَ ھب بائی پاس بند اِش کرتگ۔
سمی دین ءَ گوشتگ کہ چہ انتزامیہ ءِ نیمگ ءَ کول ءِ پیلو کنگ ءَ ابید مرچی سھب ءِ شش ءَ پولیس ءَ نندانک جاہ ءَ بیڑ برتگ ءُ تیرگواری کرتگ، زھرشانی کنوک لٹ شاپ کرتگ اَنت ءُ نوہ مردم دزگیر کرتگ۔ آیانی تہ ءَ ھشت جنین ءُ زھگ ھوار اَنت۔ دزگیر بیتگیں مردم چیریں جاھے ءَ برگ بیتگ اَنت۔ پولیس ھچ وڑیں کمک کنگ ءَ نہ اِنت ءُ آیانی بابت ءَ نہ گوش ایت کہ کج ءَ برگ بیتگ اَنت۔
آئی ءَ گوشتگ کہ ھما مردم پہ وتی آزیزانی آجوئی ءَ زھرشانی کنگ ءَ بیتگ اَنت آ وت نوں زندانی اَنت۔
