ھب چوکی: زورگریں پاکستانی لشکر ءِ دست ءَزور بیگواہ کنگ بیتگیں مردمانی کھول ءِ زھرشانی نندانک ءَ مرچی دومی روچ ءَ ھم برجاہ بیتگ۔ آدینگ ءِ روچ ءَ پہ گپ ءُ تران ءَ آتکگیں ھب انتزامیہ ءُ کھول ءِ میان ءَ گپ ءُ تران بے سوب بیتگ۔
اے وھد ءَ ھرشانی نندانک ءَ زور بیگواھیں شبیر بلوچ ءِ گھار سیما بلوچ، راشد ھسین ءِ بزاتک ماہ زیب بلوچ، یاسر ھمید، جنید ھمید، نسیر بلوچ ندیم بلوچ ءُ اھسان بلوچ ءِ کھول نشتگ اَنت۔ چہ بیگواھیں مردمانی کھولاں ابید بی وائی سی کراچی ھنکین ءِ سروک ءُ آدگہ مردم ھم ساڑی اَنت۔
زھرشانی کنوکیں مردمانی گوشگ اِنت کہ چہ ایشی پیش ھم ما اد ءَ زھرشانی ءَ نشتگیں ھب انزامیہ ءَ مارا دروگیں دلبڈی داتگ کہ شما زھرشانی ءَ ھلاس بہ کن اِت ما شمئے مردماں داں بیست روچانی میان ءَ یل کن ایں بلے آیانی گپ دروگ بیتگ اَنت۔ نوں دانکہ مئے مردم یل کنگ نہ بیتگ اَنت ما وتی زھرشانی نندانک ءَ برجاہ دار ایں۔
آیانی گوشگ اِنت کہ اگاں مئے مردمانی سر ءَ چونیں بھتامے ھست گڑا آمیدگس ءَ پیش کنگ بہ بنت۔ دانکہ مئے مردم دیم ءَ آرگ نہ بنت ما ھچ وڑ ءَ بے توار نہ بہ ایں۔
