بلوچ لبرشن آرمی ( بی ایل اے ) ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ شال، پنجگور ءُ تربت ارشانی زمہ واری منّ اتگ ءُ گوشتگ که مئے سرمچاراں شال ، پنجگور ءُ تربت ءَ سے جتائیں اُرشاں زورگریں پاکستانی لشکر نشانگ کرتگ که چه ایشی ءَ دژمن ءِ سے کارمند مرتگ ءُ کم چه کم ده ٹپی بیتگ۔
جارکش ءَ گوشتگ که بی ایل اے ءِ سرمچاراں مرچی شال ءِ شھر ءَ جان مھمد دگ ءَ زورگریں پاکستانی لشکر ءِ گاڑی یے گوں چیرتگیں شورھاں نشانگ کرتگ ، سرمچاراں دژمنیں لشکر ءِ گاڑی ھما وھد ءَ نشانگ کرتگ که آ چه ھمے دگ ءَ گوزگ ءَ بیتگ. بمب تراک ءِ آسر ءَ گاڑی ءَ سواریں چہ ھشت کارمنداں سے کارمند جاھی مرتگ ءُ سوبیدارے ءَ ھوار پنچ کارمند سکا ٹپی بیتگ۔ گاڑی سرجم ءَ تباه بیتگ.
آئی ءَ گوشتگ که سرمچاراں دگه یک کارے ءَ دوشی پنجگور ءِ شھر ءَ زورگریں پاکستانی لشکر ءِ مزنیں بنجل ءِ پھازداریں چوکی ءِ کارمندانی سر ءَ گرنیڈ لانچر گولا آس داتگ ءُ نشانگ کرتگ اَنت ، تراکانی آسر ءَ دژمنیں لشکر ءِ کم چه کم سے کارمند ٹپی بیتگ.
جارکش ءَ گوشتگ که بی ایل اے ءِ سرمچاراں دگه اُرشے ءَ 23 پروری ءِ شپ ءَ تربت ءِ ھند ناسرآباد ءَ زورگریں لشکر ءِ بنجل ءِ سر ءَ گرنیڈ لانچر ءِ گولا آس داتگ ءُ نشانگ کرتگ چه ایشی ءَ زورگریں لشکر ءِ کم چه کم دو کارمند ٹپی بیتگ۔
