بلوچ یکجھتی کمیٹی ءِ سروکاں کراچی پریس کلب ءَ پریس کانپریس کرتگ ءُ گوشتگ که بلوچ نودربرانی زوریں بیگواھی نوں دودے جوڑ بوتگ۔ آ درکانودی آوار جنگ ءُ آزارجاھاں بندیگ کنگ بنت چہ ایشی ءَ بازیں کھول سکا سسائی ءُ جانی آزارانی آماچ بیتگ. چه ایشی سوب ءَ بازیں کچے ءَ کھول ھر روچ وتی آزیزانی گستائی ءِ رنجانی اوپار کنگ ءَ لاچار اَنت که آ ریاستی زوراکی ءُ زوربیگواھی ءِ آماچ بیتگ اَنت۔
بی وائی سی ءَ گوشتگ که گوستگیں روچ ءَ تیوک ءَ چه کراچی ءَ پنچ نودربر یاسر ء سبزل الی جاه منند میلر ڈگ جما گوٹ ، سابر ء الی دوست جاه منند گریشگ ھزدار ، نسیب ء نسیم جاه منند گلشن اکبال کراچی ، گلزار ء آلم سید جاه منند پروم پنجگور ءُ سرپراز ء نواز جاه منند ماڑی پور ٹکری میتگ کراچی زورانسری بیگواه کنگ بیتگ اَنت۔
آئی ءَ گوشتگ که یاسر بلوچ لیاری زانشتجاه ءَ میڈیا سائنس ءِ نودربرے که دوشی ھما وھد ءَ آ واتر وتی گس ءَ روگ ءَ بوتگ کہ چیریں ادارھانی کارمنداں آوار جتگ ءُ بیگواه کرتگ. اے وڑیں ویل تھنا یک ءُ لھتیں مردم ءِ بیگواھی ءِ نه اِنت بلکیں یک مچی سزایے چه ایشی ءَ بیگواھیں مردم ءِ کھول تیوک ءَ آئی ءِ مات ءُ گھار داں بازیں سالاں سسائی ءُ جانی دردانی دیمپان بنت۔ ما اے ھم نزانیں آ چون اَنت۔ ریاستی ادارھانی اے شوندات ھمے گپ ءَ پدر کنت که بلوچ نودربر مھکمیں وڑے ءَ نشانگ کنگ بوگ ءَ اَنت.
آئی ءَ گوشتگ که سابر ء الی دوست ھزدار، گریشگ ءِ جاه منند اِنت که گوستگیں روچ ءَ کراچی ءِ ھند لیاری ءَ پاکستانی لشکر ءَ آئی ءِ گس ءَ بیڑ برتگ ءُ آوار جنگ ءَ پد بیگواه کرتگ. آئی ءِ بابت ءَ کھول ءَ ھچ وڑیں سرپدی دیگ نه اَنت. آئی ءِ درکانودی زوربیگواھی ءِ بگیری ءَ کھول ءَ ھزدار ءِ ھند گریشگ ءَسی پیک دگ بستگ ءُ زھرشانی ءَ نشتگ اَنت. آیانی لوٹ ھمیش اِنت سابر زوت آجو کنگ ءُ وتی کھول ءَ دست ءَ دیگ به بیت.
آئی ءَ دیمتر ءَ گوشتگ که ھمے وڑ ءَ گلزار بلوچ اکرا زانشتجاه ءِ بی بی اے ءِ نودربرے ءُ آ گوں نسیب بلوچ ءِ ھمرائی ءَ ھسن اسکوائر ءَ چه ھوٹلے ءَ زوربیگواه کنگ بیتگ اَنت. سرپراز بلوچ ، ٹکری میتگ ماری پور کراچی ءِ جاه منند اِنت ، آ ھما وھد ءَ که برانی نادراھجاه ءَ وتی ناکو ءِ پاسپان بیتگ زور بیگواه کنگ بیتگ.
آئی ءَ گوں سند ءِ سرکار ءَ لوٹ کرتگ که آ سابر ، یاسر ، نسیب ، سرپراز ءُ گلزار ءِ زوت یل کنگ ءِ دلجمی ءَ به اے دنت. ما گوں انسانی ھکانی ھندی ءُ میان استمانی ادراھاں ھم دزبندی کن اِیں که آ په ورناھانی آجوئی ءَ شریں وڑے ءَ وتی کرد ءَ پیلو به کن انت.
آئی ءَ گڈسر ءَ گوشتگ که ما اے گپ ءَ تچک ءَ کن اِیں که اگاں یاسر ، سابر ، سرپراز ، گلزار ءُ نسیب داں سے روچ ءَ یل کنگ نه بیت اَنت گڑا آیانی کھول ترندیں گامیجے ءِ زورگ ءَ لاچار بنت.
