بلوچ وومن پورم ءِبنجاھی جارکش ءَ وتی شنگ کرتگیں درشانے ءَ گوشتگ کہ اے روچ مارا بلوچ جنینانی چاگردی، دودمانی، سیاسی ءُ گھگیری ءِ ارزشت ءِ ترانگ ءَ گیج ایت کہ نہ تیوک ءَ وتی کھول ءُ چاگرد ءِ تہ ءَ جوانیں کردے پیلو کنگ ءَ اَنت بلکیں پہ وتی راجی ھکاں یکشل ءَ جھد کنگ ءَ اَنت۔ بلوچ جنیناں زوراکیانی بگیری ءَ توار چست کرتگ ءُ زوراک جنجال کرتگ ءُ زرمبشتے برجم داشتگ۔
آئی ءَ گوشتگ کہ بلوچ جنینانی زرمبشت ءِ تہ ءَ جھد یک گچین ءُ یکشلیں کارے۔ بلوچ جنین جتائیں پڑاں وتی بستار ءَ مھکم کنگ، پہ وتی ھکاں توار چست کنگ، پہ چاگردی، سیاسی ءُ دودمانی مٹیاں کار کنگ ءَ اَنت۔ اے زرمبشت بلوچستان ءَ ریاستی زوراکی، ربیتی چاگردی بُنھشت، دودمانی پابندی ءُ چاگردی پارست ءَ جنینانی پدمتگ کنگ ءَ ابید توانمند ءُ ترندبوگ ءَ اِنت۔
آئی ءَ گوشتگ کہ بلوچ جنین مدام پہ وتی راجی دیمروئی ءَ کارکنگ، جتائیں کار، وانگ ءُ جاندرائی تک ءَ مٹی آرگ ءِ جھدءَ کنگءَ اَنت۔ اے روچ ءِ برجم دارگ ءِ مول بلوچ جنینانی توانمندی ءُ ارزشت ءِ دیم ءَ آرگ ءُ ھمے کول ءَ کنگ اِنت کہ ما اے ھکانی پھریزءَ کن ایں۔
آئی ءَ گوشتگ کہ بلوچ جنین ءِ زرمبشت ءَ ورنایانی یک مزنیں کردے۔ ورنائیں جنیناں پہ ھکاں جھد کرتگ ءُاے زرمبشت ءَ نوکیں دروشمے داتگ۔ بلوچ ورنائیں جنین راجی گھگیری زرمبشت ءَگوں مھکمی ءَ دیم ءَ برگ ءَ اَنت۔ آ گوں نوکیں مارشت، ٹیکنالوجی ءُ رسانکدر ءِ پارست ءَ وتی مول ءَ دیم ءَ برگءَ اَنت۔
آئی ءَ گوشتگ کہ بلوچ جنینانی زرمبشت ءِ تہ ءَ ھواربوگ یک مھکم ءُ جوانیں کارے، اے نہ تیوک ءَ بلوچ چاگرد ءَبلوچ جنینانی گھگیری جاور ءَ گھتر کنگ ءِ جھد ءَ کنگ ءَ اَنت بلکیں ایشی ءَ میان استمان ءَ دیم ءَ آرگ ءَاَنت۔ اے جنین پہ وتی ھکاں اوشتاتگ اَنت ءُ یک نوکیں پدریچے مھکم کنگ ءَ اَنت کہ آھوکیں وھد ءَ گیش آشوب ودی کن اَنت۔
جارکش ءَ وتی درشان ءِگڈی ءَ گوشتگ کہ اے گوستانکی روچ ءِ درگت ءَ درسیں ھنکین دیوان برجم بدار اَنت۔
