بلوچ لبریشن آرمی ( بی ایل اے ) ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں سے شمبے ءِ روچ ءَ کلات ءِ ھند منگچر ءَ سیندک پروجیکٹ ءِ کاروان ءُ آئی پھازداریں پاکستانی لشکر ءِ سر ءَ اُرش کرتگ۔
آئی ءَ گوشتگ کہ اے ارش بیگاہ ءَ منگچر بازار ءِ نزیک ءَ کرتگ، وھدے کہ بی ایل اے ءِ سرمچاراں سنگر گپتگ ءُ چینی شرکت ءِ سی گاڑیانی کاروان نشانگ کرتگ۔ کارشونی ءِ رد ءَ سرمچاراں پیسر ءَ کاروان ءِ پھازدارانی یک گاڑی ہے گوں چیر کرتگیں شورھاں نشانگ کرتگ، چہ ایشی ءَ گاڑی سرجم ءَ تباہ بوتگ۔ چہ ایشی پد دژمنیں لشکر ءِ دگہ دو گاڑیانی سر ءَ گوں مزنیں سلاھاں اُرش کرتگ۔ ایشی آسر ءَ ھپت کارمند مرتگ ءُ کم چہ کم یازدہ ٹپی بوتگ۔
جارکش ءَ گوشتگ کہ سرمچارانی دومی ٹولی ءَ سیندک پروجیکٹ ءِ کاروان ءَ ھواریں گاڑی گوں مزنیں سلاہ ءُ گرنیڈ لانچراں نشانگ کرتگ اَنت۔ ھمے کاروائی ءِ میان ءَ یک ڈرائیورے دزگیر کرتگ بلوچ بوگ ءِ بنیاد ءَ کڈن کرتگ ءُ رند ءَ یل داتگ۔ اُرش ءَ سرجم ءَ یازدہ گاڑی تباہ کرتگ۔
آئی ءَ گوشتگ کہ بی ایل اے تچکی ءَ گوش ایت کہ بلوچستان ءَ درسیں لٹ ءُ پلی شوندات کہ ڈنی شرکت ءُ زورگریں ریاست ءِ چیردستی ءَ برجاہ اَنت، مئے جھد ءِ نشانگ ءَ اَنت۔ ھما شرکت کہ بلوچستان ءَ مڈیانی لٹ ءُ پل ءَ ھوار اَنت آیاں کڈن کن ایں کہ آ زوت وتی لٹ ءُ پل ءَ یل بہ کن اَنت ءُ چہ بلوچستان ءَ در بہ کپ اَنت، اگاں نہ آیانی سر ءَ مئے ارش ترند بنت۔سیندک، ریکوڈک ءُ آدگہ لٹ ءُ پلی شوندات بلوچانی رزا ابید بوگ ءَ اَنت ءُ بی ایل اے اے وڑیں چونیں ھم شوربندی یے ءَ سوبین بوگ ءَ نیل ایت۔
جیئند بلوچ ءَ گوشتگ کہ ما دری شرکت ءُ باپار ءُ آیانی کمکاراں کڈن کن ایں کہ آ زورگریں ریاست ءِ گون ءَ چونیں ھم مالی یا باپاری کول مکن اَنت۔ بلوچستان ءَ کسے ھم لٹ ءُ پلی شوربندیانی بھر بیت گڑا وتی سر ءَ پہ بیوکیں اُرشاں جاڑیگ بہ بیت۔
