بولان: پجار نہ بوتگیں سلاہ بندیں مردماں جتا جتائیں جاھاں دگ بستگ اَنت ءُ گاڑی پٹ ءُ پول کرتگ اَنت ،ھمے میان ءَ سلاہ بندیں مردم ءُ پاکستانی لشکر ءِ میان ءَ میڑے بیتگ۔ ارشانی میان ءَپاکستانی لشکر ءِ بکتر بند گاڑی یے تاوان بیتگ ءُ پاکستانی لشکر ءِ جانی تاوان ءِ ھال اِنت۔
بنشون ءِ رد ءَ سلاہ بندیں مردماں دگانی بندگ ءِ میان ءَ پی پی پی ءِ ایم پی لیاکت لھڑی انگر کرتگ ءُ آئی پھازدارانی سلاہ پل اِتگ اَنت ءُ لیاکت لھڑی کڈن کرتگ ءُ گوں پھازداراں یل داتگ۔
چوش کہ چہ ایشی ءَ پیش ھم بلوچستان ءِ جتا جتائیں جاھاں سلاہ بندیں مردماں دگ بستگ ءُ گاڑیانی پٹ ءُ پول کنگ ءِ ھواری ءَ پاکستانی لشکر ءِ کارمند ءُ آئی جوڑ کرتگیں چیریں ادارھانی کارمند چہ گاڑیاں ایر کرتگ ءُ کشتگ اَنت۔ چوشیں کاروائیانی گیشتر زمہ واری بلوچ آجوئی لوٹوکیں سلاہ بندیں گلاں من اتگ اَنت۔
بلے مرچی بولان ءِ جتا جتائیں جاھاں دگانی بند کنگ ءُ پاکستانی لشکر ءَِ سر ءَ ارشانی زمہ واری انگت ءَ ھچ گل ءَ نہ زرتگ۔
دومی نیمگ ءَ پاکستانی لشکر ءِ جارکش آئی ایس پی آر ءَ چار سلاہ بندیں مردمانی کشگءِ ٹاپار جتگ ءُ ایپ سی ءِ یک کارمندے ءِ مرگ ءِ گپ راست کرتگ۔ بلے چہ آدگہ بنشونانی نیمگ ءَ سلاہ بندیں مردمانی ھچ وڑیں تاوان ءِ گپ دیم ءَ نہ یتکگ۔
