جیمڑی: بلوچ اسٹوڈنٹس آرگنائزیشن ( بی ایس او ) ءِ نیمگ ءَ جیمڑی ءِ شھیدانی سالروچ ءِ درگت ءَ دیوانے برجم دارگ بیتگ۔ لس مردماں بازیں کچے ءَ بھر زرتگ ءُ شھیدان ءَ ستک شانی ندر کرتگ۔
دیوان گوں راجی سوت ءَ بنگیج کنگ بیتگ، دیوان ءَ بی ایس او ءِ سرکماش بالاچ کادر، کمک سرکماش آمر نزیر، پیشیگیں سرکماش ایڈوکیٹ سئید پیز، بی این پی گوادر ھنکین ءِ سروک ماجد سھرابی ءُ کریم شمبے ءَ تران کرتگ۔
آیاں شھید یاسمین، شھید ازگل ءُ شھید گلام نبی ءِ دیمونی ءَ ستک شانی ندر کرتگ اَنت ءُ گوشتگ کہ 21 پروری ءِ روچ پہ بلوچستان ءَ سیاھیں روچے۔ ھمے روچ ءَ ریاست ءَ زوراکی کرتگ ءُ پہ آپ ءِ لوٹ ءَ جیمڑی ءِ مردمانی سر ءَ تیرگواری کرتگ۔ جھان ءِ تہ ءَ اے وڑیں ویل ھچ جاہ ءَ دست نہ کپ ایت کہ پہ اے وڑیں لوٹاں مردمانی سر ءَ زوراکی کنگ بہ بیت۔
آیاں گوشتگ کہ اے ویل ءَ مرچی سی ءُ ھپت سال گوستگ بلے جیمڑی ءَ ھوار بلوچستان ءِ آدگہ ھند ءُ دمگ چہ آپ ءُ بنیادی آسراتی ءَ زبھر اَنت ۔ گڑا جیمڑی ءِ ویل بلوچستان ءُ اسلام آباد ءِ ایردست ءُ زورگپتی ءِ سیادی ءَ پیش دار ایت۔
