آواران: گوستگیں روچ ءَ مشکے ءَ بی ایل ایپ ءِ سوبمندیں اُرش ءَ پد پاکستانی لشکر ءِ نیمگ ءَ گوں مردماں زوراکی برجاہ اِنت ءُ لشکر ءَ مردمانی پجار کارڈ پُل اتگ اَنت۔
ھندی بنشون ءِ رد ءَ مَشکے بنڈکی ءُ تنک ءِ جتائیں میتگاں جلال گوٹ، ابدُلرھیم گوٹ، گپور گوٹ ،وژدل گوٹ ءُ ملنگ گوٹ ءَ پاکستانی لشکر ءَ گساں بیڑ برتگ ءُ زھگ ءُ جنیناں زوراکی کرتگ ءُ درسیں مردمانی پجار کارڈ پُل اِتگ ءُ گوں وت برتگ اَنت آیان ءَ کُشگ ءِ بیھار داتگ۔
مردماں گوشتگ کہ زی ھم پاکستانی لشکر ءَ مئے گساں بیڑ برتگ ءُ مئے گون ءَ زوراکی کرتگ۔ مرچی یک رندے پد ءَ پاکستانی لشکر ءَ مئے گساں بیڑ برتگ۔
آیانی گوشگ اِنت کہ مارا لشکر ءَ بیھار داتگ کسے چہ وتی گساں در مہ کپ ایت ءُ ڈگارانی سر ءَ مہ روت۔ جنین ھم پہ آپ ءُ دار ءَ چہ گساں در مہ کپ اَنت۔
چوش کہ بلوچستان لبریشن پرنٹ ءَ ھبدہ پروری ءَ بنڈکی ءَ پاکستانی لشکر ءِ سر ءَ اُرش کرتگ اَت، اُرش ءِ آسر ءَ سیزدہ کارمند مرتگ ءُ گوں لپٹیننٹ کاشپ ءَ ھپت کارمند ٹپی بیتگ اَت۔
بی ایل ایپ ءِ سوبمندیں اُرش ءَ پد پاکستانی لشکر ءِ زوراکی یکشل ءَ برجاہ اِنت۔
