بلوچستان لبریشن پرنٹ ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که سرمچاراں زامران ءُ نوشکے ءَ زورگریں پاکستانی لشکر ءُ پولیس دو جتائیں اُرشاں نشانگ کرتگ اَنت.
جارکش ءَ گوشتگ که بی ایل ایپ ءِ اسنائپر ٹیکٹکل ٹیم ءَ 18 پروری ءِ بیگاه ءِ چار ءَ کیچ ءِ ھند زامران، جونکی تنک ءَ زورگریں پاکستانی لشکر ءِ چوکی ءِ ڈن ءَ اوشتاتگیں کارمندے نشانگ کرتگ که آ جاھی مرتگ.
آئی ءَ گوشتگ که اُرش ءَ پد زورگریں لشکر ءَ سکا تیرگواری کرتگ بلے سرمچار په سلامتی وتی مھکمیں بندر ءَ شتگ اَنت.
جارکش ءَ گوشتگ که دومی کاروائی ءَ 16 پروری ءَ شپ ءِ ھپت ءَ مئے سرمچاراں نوشکے ءِ پولیس تھانه گوں دستی بمب ءَ نشانگ کرتگ. اُرش په پولیس ءِ کڈن کنگ ءَ پولیس تھانه ءِ دروازگ ءِ دیم ءَ کرتگ که دگه جانی تاوان مه بیت. ما گوں اِے اُرش ءَ پولیس ءَ کڈن کن اِیں ءُ گوش اِیں که آ وت ءَ چه زورگریں لشکر ءِ پله مرزی ءَ مہ کنت۔
میجر گھرام ءَ دوئیں اُرشانی زمه واری من اِتگ ءُ گوشتگ که داں زورگریں لشکر ءِ درآھگ ءَ اُرشانی برجاه دارگ ءِ کول ءَ کن اِیں.
