بلوچ لبریشن آرمی ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں کیچ ءِ ھند تربت ءَ زورگریں پاکستانی لشکر ءِ لٹ ءُ پلی شرکت ایپ ڈبلیو او ءِ بنجل نشانگ کرتگ ءُ شال ءَ زورگریں لشکر ءِ یک کمکارے کشتگ۔
جارکش ءَ گوشتگ که تربت ءِ ھند ناسرآباد ءَ بی ایل اے ءِ سرمچاراں دوشی دوازده ءُ نیم ءِ نزیک ءَ پرنٹیئر کور ورکس ( ایپ ڈبلیو او ) ءِ بنجل ءِ سر ءَ اُرش کرتگ. سرمچاراں لٹ ءُ پلی شرکت ءِ چار مزنیں گاڑی ءُ آدگہ مانداشتگ اَنت۔ یک گاڑی ءُ پرپٹے زرتگ ءُ گوں وت ءَ برتگ. سرمچاراں ساڑی ئیں مزدور کڈن کنگ ءَ پد یل کرتگ اَنت۔
آئی ءَ گوشتگ که زورگریں پاکستانی لشکر په وتی لٹ ءُ پلی مول ءُ مراداں تربت داں مند ءِ دگ ءَ جوڑ کنگ اِنت که چہ ایشی ءَ زورگریں لشکر ءِ روگ ءُ آیگ ءَ آسراتی بہ بیت. بی ایل اے اِے اُرش ءِ زمه واری ءَ من ایت ءُ تچک ءَ گوش ایت که زورگریں لشکر ءِ لٹ ءُ پلی شوربندیاں تچک ءَ نشانگ کن ایں.
جارکش ءَ گوشتگ که بی ایل اے ءِ سرمچاراں 13 پروری ءَ پنچ شمبے ءَ شال ءَ گوھر آباد ءَ اُرشے ءَ پاکستانی لشکر ءُ چیریں ادراھانی چاریگ ٹکری دودا کشتگ.
آئی ءَ گوشتگ که ٹکری دودا گسانی سر ءَ بیڑ برگ ءُ زوریں بیگواھیاں زورگریں لشکر ءِ تچک ءَ کمک کنگ ءَ ھوار مردم په پاکستانی لشکر ءِ چاریگے ءَ لاچار کرتگ ءُ لب داتگ اَنت. کشگ بیتگیں چریک ءَ چه زوربیگواھیں مردمانی کھولاں لکانی کچ ءَ زر گپتگ ءُ آیانی آزیزانی آجو کنگ ءِ دلجمی داتگ۔
جارکش ءَ گوشتگ که چریک ٹکری دودا ءَ 2014 ءَ مارگٹ چونگی ءَ زورگریں لشکر ءِ کرنل مدسر ءُ کرنل اسھاک ءِ چیردستی ءَ دژمنیں لشکر ءِ گون ءَ دگانی بند کنگ ءَ گوں بیتگ۔ 2020 ءَ سی ٹی ڈی ءِ کمکاری ءَ ھوار بیتگ۔
آئی ءَ گوشتگ که بی ایل اے چریک ٹکری دودا ءِ کوش ءِ زمه واری ءَ من ایت ءُ آئی ءِ نیٹورک ءِ آدگه مردماں ھمے وڑ ءَ گڈی آسر ءَ سر کنت.
