شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5734 روچ سرجم بیتگ۔ سے شمبے ءِ روچ ءَ نیشنل اموامی پارٹی ءِ نزیر اچکزھی، اشرپ ھان ترک، اسمان بڑیچ، جانان ملا کیل، یونس بریچ ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ ھمے ماہ ءَ زوریں بیگواھی تیز کنگ بیتگ۔ گیشتر ورنا زور بیگواہ کنگ بوگ ءَ اَنت۔
آئی ءَ گوشتگ کہ ریاست بلوچ، پشتون ءُ سندیانی گون ءَ زوراکی کنگ ءَ اَنت اے چکچینی گوشگ بیت۔ اے راج دارگ بوگ ءَ اَنت چہ ایشی ءَ ایردستیں راج گوں ترندی ءَ مارگ ءَ اَنت۔ مارا پہ انسانی ھک ءُ ایردستیں راجانی سر ءَ زوراکیانی بگیری ءَ یکجاہ بوگ ءُ جھد کنگ لوٹ ایت۔
