شال: پہ زور بیگواھیں مردم ءُ شھیداں برجاھیں وی بی ایم پی ءِ زھرشانی گدان ءَ 5729 روچ سرجم بیتگ۔ پنچ شمبے ءِ روچ ءَ ھک بہ دے اِت زرمبشت ءِ گوادر ءِ کونسلر اسلم بلوچ، نزیر اھمد بلوچ، بی ایم پی ءِ منزور رئیس ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان بلوچ سرڈگار ءِ سر ءَ زورگپت اِنت ءُ بلوچستان ءَ میان استمانی کانودانی بگیر ی ءَ کنگ ءَ اِنت۔ گوستگیں سے روچ بیت کہ پاکستانی لشکر کلات، منگچر، مچ ءُ بولان ءَ بازیں کچے ءَ اتکگ ءُ سرجمیں ھند انگر کرتگ ءُ مردماں ترسینگ ءَ اِنت چہ ایشی مردمانی زندمان جنجال اِنت۔ لشکری کارمند مدام تر ءُ گرد کنگ ءَ اَنت انچوش گمان کنگ بیت کہ پہ ٹوھیں لشکرکشی یے ءَ چن ءُ لانچ کنگ ءَ اَنت۔
آئی ءَ گوشتگ کہ سرجمیں بلوچستان ءَ پاکستانی لشکر ءُ چیریں ادارھانی کاروائی تیز کنگ بیتگ۔ لشکر پہ وتی بے سوبیانی چیر دیگ ءَ یکشل ءَ آبادیاں نشانگ کنگ ءَ اِنت۔ بلے چہ درسیں زوراکیاں ابید پاکستانی لشکرءُ چیریں ادارہ بے سوب بیتگ اَنت۔
