بلوچ وومن پورم آواران ھنکین ءِ نیمگ ءَ یک سیاسی ھیلکاری دیوانے چہ ھنکین ءِ کارمستر نورین بلوچ ءِ سروکی ءَ برجم دارگ بیتگ ، دیوان ءِ گچینی مھمان ءِ بُنجاھی کارمستر ڈاکٹر شلی بلوچ ءُ کمک کارمسترھنیپہ بلوچ ءُ بُنجاھی پتر ءِ باسک زکیہ بلوچ بیتگ اَنت۔ دیوان ءَ گل، گل ءِ کار ءُ راجی جنزانی تہ ءَ جنینانی کرد ءِ بنگپ ءِ سر ءَ ڈاکٹر شلی ءَ تران کرتگ۔
آئی ءَ گوشتگ کہ گل ءِ بزانت چوں اے وڑءَ اِنت ،ھما پلیٹ پارم کہ آئی ءِ سر ءَ جتائیں سوچانی مردم پہ یک ھاسیں مکسدے ءَ یکجاہ بہ بنت، گل گوشگ بیت ۔دومی لبزاں گوں ما چوں گشت کن ایں کہ یکیں سیمسر ءَ سْیادی داروکیں مردمانی ھما ٹولی کہ یک تچکیں لیکھے ءِ بنیاد ءَ چاگرد ءِ جتا جتائیں جیڑھانی یک تچکیں گیش ءُ گیوارے دیم ءَیار ایت ءُ آئی ءِ سر ءَ کار بہ کنت، گل گوشگ بیت۔ابید ءِ گلے ءِ جوڑشت ءَ ھچ کس ، دومی کسانی سرجم منوگر بوت نہ کنت ، ھر کس وتی وڑءَ آزات بیت ءُ ھرچی کہ بہ کنت، چہ ایشی ءَ ھمک وھد مردمانی کار ءُ کردانی تہ ءَ اڑاند پاد کاینت کہ چرائی ءَ کار ءِ درچ اوشت ءِ آماچ بیت ءُ ھچبر پہ یک ھاسیں مکسدے ءِ گرگ ءَ سوبمند بوت نہ کن اَنت ۔ پمیشکہ اے یک راستی یے کہ یک راجے اگاں یک سْیاسی لیکھے ءِ بنیاد ءَ پہ یک ھاسیں مکسدےءِ گرگ ءَ دیم ءَ کیت گڑا پہ آئی ءَ ھژدری اِنت کہ وتی کارانی بُن گیج ءَ گوں گلے ءِ جوڑشت ءَ بہ کنت ھمے پلیٹ پارم ءِ جھل ءَ آ وتی سْیاسی لیکہ ءَ گوں سْیادی داروکیں مردماں یکجاہ کنت ءُ دیما بُرت کنت۔پدا گل ءِ وجود ءِ دارگ ءِ اھم تریں شے ھمے راہ ءُ راھبند بنت کہ پہ گلے ءِ وجود ءَ آ یک چینے ءِ بستار ءَ دار ایت۔ اے چین ءِ متلب مردمی زات چہ وتی زاتاں در کپ اَنت ءُ گل ءِ پابند بنت بزانکہ گل ءِ دستور ءُ راھبندانی، چو کہ جھلی ادارہ برزی ادارھانی پابند بنت ، گل ءِ جھل ءِ دراھیں زات گل ءِ بنجاہ ءِ پابند بنت ، چہ بُنزہ ءَ بگر دانکہ بُنجاہ ءَ دراہ پہگل ءِ پروگرام ءِ پائیدگاں یک پیم کار کن اَنت ۔
آئی ءَِ گوشتگ چوش کہ ما ھمک زرمبشت ءَ واناں گڑا اود ءَ جنینانی یک مزنیں کردے مارا گندگ ءَ کیت کہ آیاں وتی کرد پیلو کُتگ ءُ نمیران اَنت، دنیا ءِ تہ ءَ ھرچی کہ سوبمندیں زرمبشت ھست اَنت آیانی سوبمندی ءِ یک مزنیں کردےجنینانی بوتگ کہ آ با سما ءُ شیوار بوتگ اَنت وتی راجی زمہ واری وتی کوپگاں زرتگ۔ چوشکہ انگولا ، الجزائر ،ویتنام ،کرد ،تامل ٹائگر ،ہندوستان ءُ دگہ بازیں ملک ھست اَنت کہ اودا جُنزانی تہ ءَ جنیناں بھر زرتگ۔ زرمبشتانی تہ ءَ ھما وھد ءَ کہ جنین پاد کیت ءُ زانت ءِ بنیاد ءَ ھوار بیت گڑا بزانکہ پہ آ راج ءَ منزل نزیک اِنت ، زالبول ءِ با سما بوئگ ریاست ءِ درد سر جوڑ باں، پرچہ کہ ریاست مُدام پندل سازیت ءُ انچیں ڈسکورس پچ کنت دانکہ جنین جھد ءَ ھوار مہ بنت ، جوش کہ باز براں ھمے ڈسکورس اسٹیٹ ءِ نیمگ ءَ پچ کنگ بوتگ کہ جنین ننگ ءُناموس ءِ نام اِنت ڈن ءَ درآھگ پہ آئی ءَ ایب اِنت ،جنین نزور اِنت آئی ءِ باڈی اینچو اسٹرونگ نہ اِنت ءُزالبول پیسلہ سازی ءِ وھد ءَ ایموشنل بیت پیسلہ زیریت ءُایش ءَ چہ مستریں ڈسکورس ایش اِنت کہ مُدام گوش اَنت کہ جنین ءِ اکل پاد ءِ کُڈ ءَ اِنت ، اے درست کورس اَنت کہ ریاست ءِ نیمگ ءَ چہ پچ کنگ بوتگ اَنت کہ دانکہ جنین جھد ءَ ھوار مہ بنت۔ ھندوستان ھما وھد ءَ کہ برتانیہ ءِ کبزہ ءَ بیت گڈامردینانی سر ءَ ارش کنگ بیت گڑا ز جنین درست دیم ءََ کاینت رھشونی کن اَنت گڑا برتانیہ ءِ انچو پریشان بیت آ گوش ایت جنینانی چواے وڑ ءَ پادآھگ ءُ زانتءِ بنیاد زرمبشت ءِ تہ ءَ ھوار بوگءَ من ءَ پریشان کرُتگ ، گڑا چہ اد ءَمن تو زانت کن ایں کہ جنین ءِ با سما بوگ چینکس ارزشت داریت ،جنین کہ با سما بیت گڑا آ یک راجے با سما کنت ۔ زی ما بلوچ راجدپتر کہ ونتگ مارا بانڈی ، گل بی بی ، چھاگلی ، مائی بیبو ، سلتان ھاتون ءِ درور گندگ ءَ اتکگ اَنت ،ما آیانی بھادری ءِ کسہ کتابانی تہ ءَونتگ اَنت بلے مروچی ما بانڈی ، گل بی بی ءُ سلتان ھاتون ءَ وتی اھد ءَ گندیں مرچی کمبر ءِ مات سلتان ھاتون ءِ درور ادءَ مئے دیوان ءِ تہ ءَ ھست اِنت کہ آیاں وتی چک دست بڈا جتگ اَنت ءُ پہ زمین ءِ پاسپانی ءَ دیم داتگ اَنت ءُ پہ ھالو ھلو وتی چک زمین ءِ میار کرُتگ اَنت ، اے مئے وش بھتی اِنت کہ من مروچی اے دلیریں ماتانی میان ءَ ساڑی ایں آیانی ھمے جوزگ ءُ بچکندگ پہ ما ھاٹیگ ءُ توکل اَنت ۔ اگاں بلوچ جنک ننگ ءِ نام بہ بوتیں گڑا بانک در نہ کپت بانک اولی جنک بیت کہ ھر سکی ءِ دیمپان بیت ءُ بلوچ ءِ گدان گدان ءَ دیستگیں واب ءَ سر کنگ ءِ جھد ءَ کنت آ گیرت ءِ نام ءَ لوگ ءَ نہ نند ایت ، ھما راہ کہ مارا پیش دارگ بوتگ گوں ستک ءُ دل مارا ھما راہ ءَ جنزگی اِنت۔
دیوان ءِ گڈ سرا بازیں گپ ءُ باوست ءَ پد دیوان ءِ ھلاسی جار جنگ بیتگ۔
