بلوچ یکجھتی کمیٹی ءِ سروک ڈاکٹر ما ہ رنگ بلوچ ءَ ماں رسانکدر ءَ وتی شنگ کرتگیں تامربندے ءَ گوشتگ که ھپتاد سال اِنت چه ریاست ءِ نیمگ ءَ بلوچ ءِ چکچینی برجاه اِنت۔ چه ایشی ءَ ھزارانی کچ ءَ بلوچ بیگواه کنگ بیتگ ءُ پنچ ھزارانی کچ ءَ بلوچ کُشگ بیتگ. ھمے وڑ ءَ که ریاست ءَ بلوچ ءِ چکچینی ءُ زوراکی ترند کرتگ اَنت بلوچاں ھم وتی سیاسی جنز مھکم کرتگ ءُ آئی ءَ دیم ءَ برگ ءَ اِنت۔ اِے سیاسی زرمبشت ءِ مول ھمیش اِنت که ھچ بلوچ وتی راجی پجار ءِ بنیاد ءَ نشانگ کنگ مه بیت۔ برجاھیں زرمبشت ءِ مستریں سوبندی ءَ ما ھمے سرپد بہ ایں که ریاست ءِ بلوچ ءِ زوراکیانی بگیری ءَ سرجمیں بلوچستان ءَ زھرشانی کنگ ءَ اِنت. بیگواھیں مردمانی کھول پہ وتی مردمانی آجوئی ءُ انساپ ءَ زھرشانی کنگ ءَ اَنت۔
آئی ءَ گوشتگ که ما مرچی گند اِیں که ریاست ءَ بلوچ ءِ چکچینی ءِ ته ءَ نوکیں شونداتے آورتگ. اِے شوندات ھمیش اِنت که آ بلوچ ءِ پسگاں تیرگواریاں نشانگ کنگ ءُ آیانی لاشاں چگل دیگ ءَ اِنت. گوستگیں روچاں تربت ءَ بلوچ ءِ وانندگ ءُ زانتکاریں پسگ اللہ داد بلوچ چہ ھمے تیرگواریاں ءَ کُشگ بیتگ ۔ تیرگواری کنوکیں مردم ریاست ءِ کارمند ءُ آئی ءِ داشتگیں کشندہ ٹولی ءِ مردم بیتگ اَنت۔ اللہ داد اولی مردم نہ اِنت چہ ایشی ءَ پیش ھم بازیں بلوچ پسگ ھمے وڑیں تیرگواریاں کشگ بیتگ اَنت۔ چہ ایشی ءَ اَبید ھما مردم کہ یکبرے ریاست ءِ دست ءَ زوربیگواہ کنگ بیتگ اَنت چو گْوادر ءَ زکریا ءِ پیم ءَ چہ آجوئی ءَ پد تیرگواریاں کشگ بیتگ۔ ھمے وڑ ءَ نوید کہ چہ بلیدہ ءَ پہ وتی برات ءِ زوریبگواھی ءِ بگیری ءَ زھرشانی کنگ ءَ بیت آ ھم کشگ بیتگ۔
ڈاکٹر ماہ رنگ ءَ گوشتگ کہ ما ھمے سرپد بہ ایں ھمے پیم ءَ ریاست ءَ بلوچ ءِ چکچینی ءِ تہ ءَ تیزی آرتگ ایشی ءِ بگیری ءَ پما ھم درآھگ ءُ توار چست کنگ اَلمی اِنت، پرچا کہ مرچی پہ بلوچ ءَ آئی ءِ جند ءِ ڈیھ تنگ کنگ بیتگ۔ اللہ داد ءِ نشانگ کنگ بلوچ ءِ زانت ءُ سسّا ءِ نشانگ کنگ اِنت۔ بلوچ وانندگ گوں کمتریں آسراتیاں وانگ ءَ اَنت ءُ اِے آیانی ھمے ھُب ءُ واھگ اِنت کہ گوں وانگ ءَ وتی راج ءَ دیم ءَ بہ بر اَنت بلے آ چہ ھمے راجدوستی ءِ جوزگ ءَ نشانگ کنگ ءَ بوگ ءَ اَنت۔
آئی ءَ گوشتگ کہ ما سرپد بہ ایں بلوچ یکجھتی کمیٹی ریاست ءِ ھمے شوندات ءِ بگیری ءَ اوشتاتگ۔ ھمے درگت ءَ 9 پروری داں 11 پروری ءَ تربت ءَ شھید پدا چاراہ ءَ زھرشانی گدانے برجم دارگ بیت۔ ما گوں سرجمیں بلوچ راج ءَ دزبندی کنان کہ بلوچ پسگانی ناھکیں کوش ءِ بگیری ءَ اِے زھرشانی گدان ءَ ھوار بہ بنت۔
