تربت: آپسر ءَ چہ زورگریں پاکستانی لشکر ءِ تیرگواری ءَ ٹپی بیتگیں ورنا بیران بیتگ۔
بیران بیتگیں ورنا ءِ نام کمبر ء مھراب اِنت کہ آپسر بلوچی بازار ءِ جاہ منند اِنت۔ کمبر 30 جنوری ءَ چہ پاکستانی لشکر ءِ تیرگواری ءَ ٹپی بیتگ ءُ پہ اِلاج ءَ کراچی ءَ برگ بیتگ، آئی ءَ دوشی ٹپانی درد نہ سگ اتگ اَنت ءُ بیران بیتگ۔
چوش کہ 30 جنوری ءَ پاکستانی لشکر ءَ پرپٹ ءَ سواریں سے ورنا ءِ سر ءَ تیرگواری کرتگ اَت کہ چہ ایشی ءَ مراد جان ء ھکیم جھمنند آپسر آسکانی بازار ھما روچ ءَ بیران بیتگ ءُ آ دگہ ھمراہ دلشاد ء اللہ بکش پاکستانی لشکر ءَ آوار جتگ ءُ بیگواہ کرتگ کہ انگت ءَ بیگواہ اِنت۔
