بلوچ نیشنل موومنٹ ءِ سرکماش ڈاکٹر نسیم ءَ ماں چاگردی رسانکدر ایکس ءَ وتی درشان ءَ گوشتگ کہ اسمہ جتک ءِ آوار جنگ اِیوک ءَ میارباری یے نہ اِنت بلکیں بلوچانی پہ ترس آماچ کنگ ءُ بے توار کنگ ءَ پاکستان ءِ برجاھیں زوراکیانی درچ ءِ بھرے۔ یک دھکے ءَ گیش اِنت کہ اسمہ ءُ آئی کھول لڈینگ، نشانگ کنگ ءُ چہ ریاست ءِ داشتگیں کشندہ ٹولی ءِ نیمگ ءَ ترسینگ بوگ ءَ اَنت۔
ڈاکٹر نسیم ءَ گوشتگ کہ آ نوں ھمے زوراکاں زوربیگواہ کرتگ ھمیشاں آئی دشتار ھما وھد ءَ کشتگ کہ آئی ءَ زوریں آروس نہ من اتگ۔ اے میار ءَ آ بے ترس ءَ کنگ ءَ اَنت ءُ آیاں پاکستان پیپلز پارٹی ءِ کلانھیں سروک نواب سنااللہ زھری ءِ کمک گون اِنت۔ آئی ءِ کارمند بلوچستان ءَ تچکی ءَ کار کنگ ءَ اَنت۔
ائی ءَ گوشتگ کہ رھیم بکش ءُ زھور جمالزھی ءِ وڑیں میاربار کہ آیاں بازیں آوارجنی، کشت ءُ کوش ءُ زوراکی کرتگ مرچی ھم آیاں ریاست ءِ کمک گوں اِنت ءُ کانود آیاں گرگ ءَ نہ اِنت۔
ڈاکٹر نسیم ءَ گوشتگ کہ اے تیوک ءَ انسانی ھکانی بگیری نہ اِنت بلکیں میارباری یے۔ بلوچ جنین ءِ زوریں بیگواھی ءُ زوراکیاں گوں ترندیں دانکاں ایر جن آں۔ میان اُستمان پاکستان ءَ بلوچستان ءِ تہ ءَ بیوکیں میارباریانی جست ءَ بہ کنت ءُ اسمہ جتک ءِ زوت یل کنگ ءِ لوٹ ءَ بہ کنت۔
ڈاکٹر نسیم ءَ گوشتگ کہ بے تواری گوں میارباری ءَ شریداری زانگ بیت۔ اے بابت ءَ میان استمانی انسانی ھکانی گل ءِ کارکناں زوت دزمانجنی کنگ لوٹ ایت۔
