ھب چوکی: بوانی ءَ زور بیگواھیں مردمانی کھول ءِ زھرشانی نندانک ءَ بی وائی سی ءِ سروکاں پریس کانپریس کرتگ ءُ گوشتگ کہ زی دمگدار اتکگ ءُ آئی ءَ لھتیں لوٹ ایر کرتگ ءُ گوشتگ چہ بیگواھیں مردماں یکے یا دو مردم دیم ءَ آرگ بیت ءُ آیانی بابت ءَ کانودی کاروائی کنگ بیت،آمیدگس ءَ پیش کنگ بنت، اے بابت ءَ کول کنگ بیتگ، چوش کہ رند ءَ ایپ آئی آر ءِ جیڑہ ءِ سر ءَ اے کول منگ نہ بیتگ۔
آئی ءَ گوشتگ کہ اے وھد ءَ زھرشانی نندانک ءَ نوروز اسلام، یاسر ھمید، جنید ھمید، نسیر جان، ندیم بلوچ ءُ چاکر ھان بگٹی ءِ کھول ساڑی اَنت۔ مرچی کمک دمگدار نیاتکگ ءُ جھلی اگدہ دار اے ڈی سی الی رزا کوسہ ءُ آدگہ اگدہ دار ساڑی بیتگ اَنت ءُ ھمے گپ ءِ دلجمی دیگ بیتگ کہ اے کول زور بیگواھیں مردمانی کھولاں گوں کمک دمگدار ءَ کرتگ گڑا اے گپ آیانی پون ءِ رد ءَ پکا کرتگ ۔ اے کول ءَ ھمے گپ گوشگ بیتگ کہ چاکر بگٹی ءِ سر ءَ شال ءِ سی ٹی ڈی ءَ بھتام جتگ کہ31 جنوری 2025 ءَ آئی ءِ سر ءَ ایپ آئی آر کنگ بیتگ۔ چہ اے گپ ءَ ھمے گمان کنگ بیتگ کہ آ زور دیگ بیتگ اَنت ءُ پہ دیم ءَ آرگ ءَ ایپ آئی آر کنگ بیتگ۔ ما ھمے لوٹ ءَ کن ایں کہ اے کیس ءِ میان ءَ دگہ پندل سازی کنگ ءُ مئے مردم دروگیں میڑاں جنگ مہ بنت۔
آئی ءَ گوشتگ کہ دیمتر ءَ پہ اے مردماں یک پترے ٹھینگ بیتگ کہ آیاں بیست روچ ءِ وھد لوٹ اِتگ، ایشی ءِ تہ ءَ نور اسلام، نسیر جان، ندیم بلوچ، جنید ھمیدءُ یاسر ھمید ءِ آجوئی ءِ بابت ءَ دلجمی دیگ بیتگ۔ کمک دمگدار ءِ نیمگ ءَ اے درسیں گپ منگ بیتگ اَنت اے میان ءَ دگہ ھچ پیمیں ویل مہ بیت۔
آئیءَ گوشتگ کہ اے گپ مرچی 2 پروری 2025 ءَ کھولانی نیمگ ءَ منگ بیتگ اَنت ءُ زھرشانی نندانک ھلاس کنگ بیتگ۔ اگاں داں بیست روچ ءَ اے مردم آجو کنگ نہ بیت اَنت گڑا بلوچ یکجھتی کمیٹی اے جیڑہ ءِ سر ءَ وتی آیوکیں گامگیج ءِ جار ءَ جنت۔
