بلوچ یکجھتی کمیٹی ءَ ماں رسانکدر ءَ وتی شنگ کرتگیں پنتاک ءَ گوشتگ کہ دُنیا ءِ بُندپتر گواہ اِنت ھر ھما راج ءِ سرا کہ مُچی زوراکی یے بوتگ گڑا آئی ءِ دیم مھکمیں گھگیریاں داشتگ ءُ زوراکی پروش داتگ۔ بلوچ کہ ھپتاد ءُ پنچ سال ءَ گیش انت مُچی زوراکیانی آماچ اِنت اے میان ءَ ورناہ، کماش چُک ءُ جنین کس چہ زوراکیں استان ءِ زوراکیاں نہ رک اِتگ ۔مروچی سرجمیں بلوچستان ءَ اے زوراکیانی آس روک اِنت۔ماتانی دل ءِ بند ءُ پتانی پیری ءِ ھسا زاراک ءِ بندیگجاھاں آزارانی دیمپان اَنت یا آیانی نُگرھیں جان تیرانی دْرد ءَ اَنت اے پئمیں جاورے ءَ کہ بلوچ زندگ اِنت تاں آئی ءِ زندگی ءَ را ایوک ءَ گھگیری مانا یے دات کنت، گھگیری زندگی اِنت، بدلی ءُ وشھالی ءِ اولی ءُ گُڈی راہ اِنت۔ بید ئے گھگیری ءُ جَھد جنگ ءَ زوراکیانی دیم ءِ دارگ نہ بیت۔ زوراک ءِ ترس ءَ آئی ءِ زوراکیانی دیم ءَ بے توار بوھگ مَرگ اِنت ءُ گھگیری ءِ راہ ءَ مِرگ زندگی ءِ بندات اِنت۔
آئی ءَ گوشتگ کہشھید بالاچ ءُ ایدگہ ورناھانی شھید کنگ ءَ گوں لشکر ءَ جھدے کرتگ کہ بلوچ راج ءِ تہ ءَ کشت ءُ کوش ءِ نوکیں درچے بندات بہ کنت، شھید بالاچ ءِ شھیدی ءَ چہ ھپتگے ءِ میان ءَ زوراکیں لشکر ءَ چہ دہ ءَ گیش ورنا دروگیں میڑاں شھید کُتگ اَت ءُ گوستگیں دو سال ءَ چہ سد ءَ گیش ورنا ھمے رنگیں وئیلاں شھید کنگ بوتگ اَنت۔ اگاں شھید بالاچ ءِ کھول ءُ بلوچ راج ءَ ھمت مہ کتین ءُ اے زوراکیانی دیم ءَ مہ اوشتاتیں اَنت باریں داں انوں دگہ چینکس تنگوئیں ورناھانی لاش ماں ویرانگ ءَ کپتگ اَت۔ اے ھمے جھد ءِ برورد اِنت کہ دگہ سدانی ھساب ءَ ورنا ءِ لاش بلوچ ءَ را سوگات کنگ نہ بوتگ پمیشکا کہ سرجمیں بلوچ راج ءَ چہ بلوچ یکجھتی کمیٹی ءِ نیمگ ءَ بندات بوتگیں بلوچ جھد ءِ ھمراھداری کنگ لوٹ اِیت ءُ ھرچ رنگیں کمک کنگ لوٹ اِیت۔اگاں بلوچ راج ءَ اے میان ءَ نزوری پیش داشت ءُ اے جھد نزور داشت تہ سرکار الم ءَ وتی وار ءَ وش کنت ءُ گیشیں بلوچ ءِ کُشگ ءُ جنگ ءَ بندات کنت۔ مروچی چست بوتگیں بلوچ راج ءِ جُنز بلوچ ءِ ھستی ءِ رکینگ ءُ برجم دارگ ءِ جنز اِنت بلوچ ءَ را داں گُڈی وَس ءَ گوں اے جُنز ءَ بندوک بوھگی اِنت۔
آئی ءَ گوشتگ کہ زوراک پہ وتی ایردستانی بے توار کنگ ءَ ھر وڑیں زوراکیاں چک ءُ پد نہ بیت، آ ترُی جنگ ءُ کُشگ بہ بیت گار ءُ بیگواہ کنگ بہ بیت یا گسانی ماندارگ ءُ در پہ در کنگ بہ بیت ۔بلے زوراکی ءِ آماچیں مردمانی گوْر ءَ پشت کپتگیں راہ گھگیری اِنت۔ ھمے گھگیری ایرست ءِ باندات ءَ را ایمن کنت۔بلوچ راجے ءِ بستار ءَ مدام جنگ ءُ کُشگ بوھگ ءَ انت، گار ءُ بیگواہ بوھگ ءَ اِنت بلے چہ گھگیری ءَ ھچ وڑ ءَ پد کنز نہ اِنت، ھمے گھگیری ءِ آسر اِنت کہ نمیرانیں بالاچ ءِ نمیرانی ءِ روچ ءَ بگر داں مرچی بلوچ پاد آتکگ ءُ زوراکی ءِ بگیری ءَ اوشتاتگ۔ بی وائی سی ءِ سروکی ءَ بندات بوتگیں اے جنز ءَ مرچی دُنیا ءِ کُنڈ کُنڈ ءَ بلوچ ءِ لگتمالی ءُ بزگی پدر کتگ ءُ زوراک ئے ترس ءِآماچ کرتگ۔ اے جنز بلوچانی جُنز اِنت ایشی ءِ آسر پہ بلوچ ءِ آسودگی ءُ ایمنی ءَ اِنت پمیشکا ھژدی اِنت کہ بلوچ اِے جُنز ءَ وتی بہ کنت گوں بی وائی سی ءَ ھمکوپگ بہ بیت۔
آئی ءَ گوشتگ کہ اے جُنز کہ بی وائی سی ءَ بندات کتگ اے پہ بلوچ ءِ پدریچ ءُ زندگی ءَ اِنت اے جُنز ءَ را مروچی وتی مھلوک ءِ زلورت اِنت، مئے ءُ شمئے زندگ بوھگ المی اِنت ایشی ءِ ھمراہ بہ بئیں ءُ ایشی ءَ را کمک بہ کن ایں ۔ یات بہ بہ اِت کمک کجام اوں بستار ءَ بوت کنت، روانکاں بھر زورگ بہ بیت، بلوچ چُکچینی ءِ بگیری ءَ وتی زھگ ءُ نودربراں سرپدی دیگ بہ بیت یا بی وائی سی ءِ کال ءَ دوکان ءُ بازارانی بند کُنگ بہ بیت۔زوراک مارا بلوچ ءِ نام ءَ جنگ ءُ کُشگ ءَ اِنت مارا اوں بلوچ بوھگی انت ءُ ایشی ءِ دیم دارگی انت اگاں مروچی بلوچ بے توار بوت گڑا باند ءَ پہ بلوچ ءَ ھچ پشت نہ کپ ایت۔ پمیشکا سید ءَ گوشتگ:
راجے کہ بہ بیت گُنگ نہ مانیت نہ مانیت
مانیت پہ ادارُکے بزاں زندگ ءُمُردار
