بلوچ نیشنل موومنٹ ( بی این ایم ) ءِ ماں جرمنی ءَ کمک کارگشاد شلی ءَ آپرن پلانٹز ، ھنوپر ءَ بیتگیں ’’ ماں کوبانی ءَ کردانی دائش ءِ بگیری ءَ سوبمندی ءِ دھمی سالروچ ‘‘ ءِ درگت ءَ بیتگیں زھرشانی ءَ گل ءِ جھگیر ءِ بستار ءَ بھر زرتگ ءُ گوں کردانی جھد ءَ یکجھتی درشانتگ۔
آئی ءَ گوں کرد زھرشانی کنوکاں گپ جنان ءَ گْوشتگ بلوچ ءُ کرد یک وڑیں جاورانی دیمپان اَنت۔ زمانگے بیت کہ دوئیں راجانی سر ءَ چہ مھترھند ءِ پلہ مرزی ءَ زوراکی بیگ ءَ اِنت ، ھر دوئیں راج چیردست کنگ بیتگ اَنت۔
شلی ءَ گْوشتگ ھرچ راج ءِ آشوبی دیمروئی ءَ جنینانی بنکی کردے بیت۔ اے وش بھتی یے کہ کرد ءُ بلوچ دوئینانی تہ ءَ سیاسی سنچ داروک ،گیدر ، وتواک ءُ پر ھاٹیگیں جنین ھست۔
آئی ءَ مردمی اگبالانی نامی ئیں تْرامگیجانی گزارشانی بن شوناں درائینتگ انسانی ھکانی پانک ( ہیومین رائٹس واچ ) ءُ میان استمانی پھلکار ( ایمنسٹی انٹرنیشنل ) ءَ بلوچ جنینانی بیگواھی ءِ سر ءَ دستاویز جوڑ کرتگ ، پمیشکا ڈنڈ دیگ بیتگ اَنت کہ آیانی مردین آجوئی ءِ زْرمبشت ءَ ھوار اَنت۔اے زور بیگواھیانی میان راجی راھبند ءِ پجیگ ءَ پہ شھرمنندی ءُ سیاسی ھکاں میان راجی مسام (ICCPR) ءِ بگیری اِنت۔بلوچ ءِ اگبالانی پانکجنیں جنینیں کارکن ءُ اھوالکاراں مدام بیھار ، ترس ، پاتراپ ءُ باز بر ءَ درانڈیھی ءِ دیمپانی اِنت۔انچوش کہ ماں کینیڈا ءَ شھید بانک کریمہ درانڈیھی ءِ دیمپان اَت ۔
شلی ءَ گْوشتگ بلوچ جنین ءِ زرمبشت ءَ ارزشت آئی ءِ ھاٹیگ ءُ پہ مزدانک ءَ ھمگرنچی ءِ چیدگ اِنت، اے جاورانی تہ ءَ ھم کہ آ گْرانیں ڈاہ ءُ جیڑھانی دیمپان اَنت۔ بلے انگت آ بلوچ ربیدگ ءِ پھزدار ءُ گھگیری ءِ توار ءِ بستار ءَ وتی کرد ءَ پیلو کنگ ءَ اَنت۔
