بلوچستان لبریشن پرنٹ ءِ جارکش میجر گھرام ءَ وتی درشانے ءَ گْوشتگ کہ سرمچاراں 25 جنوری ءِ شپ ءِ ھشت ءَ کوھلو ءِ ھند نوئے شم ءَ لونڈ ءَ برجاھیں پاکستانی لشکر ءِ چوکی ءِ سر ءَ گوں مزنیں سلاھاں اُرش کُرتگ۔ اُرش ءَ دژمن ءِ دو کارمند لانس نائیک راھب ھسین ء گُلام ھیدر ءُ دگہ یک سپاھی یے کہ کشمیر ءِ جھمنند مُرتگ۔
آئی ءَ گْوشتگ کہ زورگریں لشکر چہ وتی پروش ورگ ءِ سْوب ءَ سرمچارانی اُرشاں مُرتگیں وتی کارمندانی پجار ءُ آیانی کَچ ءَ چیر دیگ ءِ جُھد ءَ کنت بلے باز رند ءَ مُرتگیں کارمندانی کھول آیانی پجار ءَ پدر کن اَنت۔
آئی ءَ گْوشتگ کہ سرمچارانی سوبمندیں اُرش ءَ پد لشکر ءَ سرویلنس ڈرون بال داتگ کہ سرمچاراں نشانگ کُرتگ ءُ دور داتگ ۔ وھدے کہ سرمچاراں لشکر ڈرون کیمرہ ھم نشانگ کُرتگ ءُ دور داتگ، پد ءَ لشکر ءِ کمک ءُ پہ ڈرون ءِ چست کنگ ءَ ھندی کشندہ ٹولی (مری سیکیورٹی) ءِ کارمند اَتکگ اَنت کہ سرمچاراں ایشانی سر ءَ ھم اُرش کُرتگ،کہ چہ ایشی ءَ کشندہ ٹولی ءِ چار کارمند ٹپی بیتگ۔
جارکش ءَ گْوشتگ کہ دگہ یک اُرشے ءَ سرمچاراں بیست ءُ پنچ جنوری ءِ شپ ءِ یازدہ ءُ نیم ءَ بولان ءِ ھند آپ گم ءَ شال سبی شھدگ ءِ سر ءَ برجاھیں زورگریں پاکستانی لشکر ءِ چوکی ءِ سر ءَ اُرش کُرتگ۔اُرش یازدہ ءُ نیم ءَ داں دوازدہ ءَ برجاہ بیتگ،اُرش ءَ سرمچاراں نوکیں مزنین ءُ وتکاریں سلاہ کارمرز کُرتگ، چہ ایشی ءَ دژمن ءِ یک کارمندے مُرتگ ءُ سَے ٹپی بیتگ۔
آئی ءَ گْوشتگ کہ زورگِپتیں بلوچستان ءِ کُنڈ کُنڈ ءَ سرمچار زورگریں ریاست ءِ لشکر ءُ آئی ءِ کمکاراں نشانگ کنگ ءَ اَنت،کہ ایشی ءِ زھر ءَ پروش وارتگیں ریاست ءِ لشکر لس مردمانی سر ءَ اُرش کنت ءُ زوراکی ءِ نشانگ کنت۔
میجر گھرام ءَ وتی درشان ءِ گُڈی ءَ اُرشانی زمہ واری منّ اِتگ اَنت ءُ گْوشتگ کہ مئے اُرش داں سرڈگار ءِ آجوئی ءَ زورگریں لشکر ءُ آئی ءِ کمکارانی سر ءَ برجاہ بنت۔
