بلوچ یکجھتی کمیٹی ءِ نیمگ ءَ بلوچ چکچینی ءِ یاتگاریں روچ ءِ درگت ءَدالبندین ءَ راجی مچی گوں سوبمندی ءَ آسر بیتگ۔ اےراجی مچی ءَ رکشان ءَ ھوار چہ سرجمیں بلوچستان ءَ ھزارانی کچ ءَ مردماں بھر زرتگ۔ راجی مچی ءَ بلوچ یکجھتی کمیٹی ءِ سروک ڈاکٹر ماہ رنگ، سبگت اللہ شاہ جی، ڈاکٹر سبیہ، لالا وھاب، سمی دین ءُ آدگہ مردماں تران کرتگ۔
راجی مچی گوں راجی سوتءَ بندات کنگ بیتگ۔ مچی ءَ بلوچستان ءِ جتائیں دمگانی بلوچ چکچینی ءِ رپورٹ پیش کنگ بیتگ اَنت۔ ریاستءِ نیمگ ءَ پہ راجی مچی ءِ بے سوب کنگ ءَ گوستگیں سے روچ بیت کہ دامگ بند کنگ بیتگ اَنت۔
مرچی سھب ءَ موبائل نیٹورک ءَ ھوار بی ٹی سی ایل ھم سرجم ءَ بند کنگ بیتگ۔ چہ ایشی ءَ ابید سرجمیں رکشان ءَ ھزارانی کچ ءَ ریاستی لشکر آرگ بیتگ۔ دالبندین ءُ سرجمیں چاگے ءِ مردم گوں جتائیں وڑءُ پیماں ترسینگ ءُ بیھار دیگ بیتگ اَنت۔
چہ درسیں زوراکیاں ابید سرجمیں بلوچستان ءَ کاروانانی دروشم ءَ ھزارانی کچ ءَ مردماں بھر زرتگ ءُ ریاستی بلوچ چکچینی شوندات ءِ بگیری ءَ بلوچ راجی مچی ءَآتکگ ءُبلوچ راجی یکجھتی ءِ منانک زندگ اِش داشتگ۔
