بلوچ وومن پورم ڈی جی ھان ھنکین ءِ نیمگ ءَ 20 جنوری 2025 ءَ جناہ پیملی پارک ءَ ھنکین ءِ سرکماش پوزیہ ءِ سروک ءَدیوانے برجم دارگ بیتگ۔ دیوان ءَ بلوچ راجدپتر ءَ بلوچ جنینانی کرد ءَ سر ءَ مبشرہ بلوچءَ تران کرتگ۔ آئی ءَ بندات ءَبلوچ وومن پورم ءِ درگت ءَگپ جتگ کہ بلوچ وومن پورم ءَ لوٹ چے اَنت ءُ ما چہ بلوچ وومن پورم ءِ راھبند ءِ سر ءَ راجی زمہ واریان چون پیلو کن ایں۔
آئی ءَ گوشتگ کہ بلوچ جنینانی چاگرد یا راجدپترءِ تہ ءَ سک دیر اِنت یک مزنیں کردے پیلو کنگ ءَ بیتگ اَنت ، یک راجے ءِ تہ ءَ چہ نیم ءَ گیش آبادی جنینانی اَنت۔ اگاں ما بلوچ چاگرد ءَ گند ایں کہ مرچی بلوچ یک نزوریں راجے اِنت ءُبلوچ دری زوراکانی ایردست اِنت اے جاورانی تہ ءَ بلوچ جنین پہ وتی راج ءِ رکینگ ءَ گوں وتی براتاں ھمکوپگ اَنت۔ بازیں بلوچ جنین ھست اَنت کہ مرچی ریاستی زوراکیانی دیم ءَ اوشتاتگ اَنت۔
آئی ءَ گوشتگ کہ بلوچ راجدپتر ءُ ما بلوچ جنینانی کرد ءِ سر ءَ گپ کن ایں گڑا بلوچ چہ بنیاد ءَ یک سیکولریں راجے بیتگ۔ بلوچ ءَ بازیں جنگ کرتگءُ بازیں جنگاں بلوچ مرداں کہ توپک چست کرتگ ءُ مڑ اتگ اَنت گڑا بلوچ جنیناں ھم سلاہ زرتگ ءُ گوں دژمنءَ جنگ کرتگ۔ بیبو، بانڑی ءُ گل بی بی ھما بلوچ جنین اَنت کہ گوں وتی مردیناں ھمکوپگ بیتگ ءُ پہ وتی راج ءَ جنگ اِش کرتگ۔
آئی ءَ گوشتگ کہ اگاں ما انوگیں دور ءَ چار ایں 2000 ءَ بانک کریمہ ءِ چہ درسیں بلوچ جنیناں آئی نام مزن اِنت۔ بانک اولی جنین بیتگ کہ آئی سیاسی راھبند ءِ سر ءَ بلوچ ءِ ھک ءِ گپ جتگ۔ چہ بانک کریمہ ءِ نمیرانی ءَ اچ سیستان بلوچستان ءَ بگر داں ڈی جی ھان ءَ بلوچ جنین یک توار بیتگ ءُ چہ وتی گساں در کپتگ اَنت۔
