ھاران: پجار نه بیتگیں مردماں گوستگیں شپ ءِ اَدار دو ءَ زوربیگواھیں مکتار اھمد مینگل ءِ گس ءِ سر ءَ دستی بمب اُرشے کرتگ.
بنشون ءِ رد ءَ مکتار اھمد مینگل ھاران ءِ ھند سراوان ءِ جھمنند اِنت ءُ آ 15 جولائی 2024 ءَ کشنده ٹولی ءِ کارمنداں آوار جتگ ءُ بیگواه کرتگ. آئی ءِ زوریں بیگواھی ءِ بگیری ءَ کھول ءَ ھاران ءِ ریڈ زون ءَ زھرشانی کرتگ اَت. چه ایشی ءَ پیش ھم یکبرے کشنده ٹولی ءِ کارمنداں بیگواھیں مکتار اھمد ءِ گس ءِ سر ءَ اُرش کرتگ.
ھندی مردمانی گوشگ اِنت که مکتار اھمد مینگل ءِ آوارجنی ءَ کشنده ٹولی ءِ سروک شپیک مینگل ءِ دست مان اِنت ءُ په آئی یل کنگ ءَ چه کھول ءَ ھشت کروڑ زر لوٹگ ءَ اِنت.
