بلوچستان لبریشن پرنٹ ءَ 10 نومبر 2024 ءَ دشت ءِ ھند کُڈان ءَ زورگریں پاکستانی لشکر ءِ بنجل ءِ سر ءَ بوتگیں ترندیں ارش ءِ تامر چہ وتی رسانکدری تندجاہ آشوب چینل ءَ سنگ کرتگ۔
بیست ءُ پنچ منٹ ءُ پنجاہ ءُ چار سیکنڈ ءِ تامر ءِ بندات ءَ گندگ بیت کہ بی ایل ایپ ءِ جنگول بازیں کچےءَ چہ کوھاں دیم پہ وتی کاروائی ءِ نیمگ ءَ روگ ءَ اَنتءُ آیان ءَ نوک ءُ مزنیں سلاہ گوں اِنت۔ سرمچارانی یک ٹولی یے گندگ بیت کہ رؤک ءُ آؤکیں گاڑیاں دارگ ءُ چارگ ءَ اَنت۔
بی ایل ایپ ءِ جنگول چہ وتی جنگی کاروشونیاں زورگریں پاکستانی لشکر ءِ بنجل ءِ نزیک ءَ روگ ءَ گندگ بنت کہ آ گوں ترندی ءَ پاکستانی لشکر ءِ سر ءَ ارش کن اَنت۔ ارش ءِ لھتیں دمانانی میان ءَ گوں راکٹ لانچر ءُ آدگہ سلاھاں بنجل ءَ نشانگ کن اَنت۔ چہ گولایاں نشانگ بوگ ءَ لشکر ءِ بنجل ءِ سنگر تباہ بنت۔
تامرءِ دیم ءَ گندگ بیت کہ بی ایل ایپ ءِ جنگول بنجلءِ ھنچو نزیک ءَ روگ ءَ اَنت آ گوں دستی ءَ بمباں بنجل ءِ سنگراں نشانگ کن اَنت۔ ھمے جنگءِ میان ءَ بی ایل ایپ ءِ جنگولے تیر وارت ءُ پہ مدامی نمیران بیت۔
تامر ءِ گڈی ءَ گندگ بیت کہ بی ایل ایپ ءِ جنگول دو گاڑیاں سوار اَنت ءُ آیا ں بیرک گوں اِنت لس مردم راجی جنگولان سلام کنگ ءَ اَنت۔
اے ارش ءِ زمہ واری میجر گھرام ءَ من اتگ ءُگوشتگ اَت کہ سرمچاراں 10 نومبر 2024 ءَ یک شمبے ءِ بیگاہ ءِ پنچ ءَ کیچ ءِ ھند دشت کھڈان ءَ برجاھیں زورگریں پاکستانی لشکر ءِ بنجل چہ دو نیمگاں انگر کرتگ ءُ گوں نوک ءُ مزنیں سلاھاں اُرش کرتگ۔ اُرش ءَ پاکستانی لشکر ءِ یک سروگانے ءَ ھوار 16 کارمند جاھی مرتگ ءُ باز لشکری ٹپی بوتگ اَنت۔ اُرش ءَ دژمنیں لشکر ءَ سکا جانی تاوان بوتگ۔
آئی ءَ دیمتر ءَ گوشتگ کہ اُرش ءَ بی ایل ایپ ءِ انٹیلیجنس بھرگ ءُ کربان یونٹ ءِ ھمبلاں بھر زرتگ۔ سرمچاراں دژمنیں لشکر ءِ بنجل ءِ سر ءَ گوں نوک ءُ ٹوھیں سلاھاں ترندیں اُرش کرتگ ءُ بنجل ءِ نزیک ءَ سر بوتگ اَنت سرمچاراں بنجل ءِ پھازداریں دیوال ءُ سنگر گوں راکٹ ءِ گولایاں نشانگ کرتگ ءُ تباہ کرتگ اَنت۔ سرمچار دژمن ءِ بنجل ءَ پترگ ءُ بنجل ءِ سلاھانی دستیگی کنگی بوتگ اَنت کہ ھمے میان ءَ کربان یونٹ ءِ سرمچار لپٹینٹ جمال شھید بوتگ۔ ھمے سوب ءَ سرمچاراں شھیدیں ھمبل ءِ لاش زرتگ ءُ چہ اود ءَ سلامتی درکپتگ اَنت۔
چوش کہ چہ ایشیءَ پیش ھم بلوچستان لبریشن پرنٹ ءَ دشت سبدان ءَ 25 جنوری 2022 ءَ پاکستانی لشکر ءِ بنجل دستیگ کرتگ اَت اے ارش ءَ پاکستانی لشکر ءِ ھبدہ کارمند کشتگ ءُ بنجل ءِ درسیں سلاہ ءُ سامان دستیگ کرتگ اَنت۔ص
