بلوچ اسٹوڈنٹس ایکشن کمیٹی ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ بساک ءِ نیمگ ءَ بلوچستان کتاب کاروان ءِ رد ءَ مرچی ڈالبندین، ھاران، کلات، منگچر، بل نگور ءُ ھب ءَ کتاب میڑہ برجم دارگ بیتگ ۔
آئی ءَ گوشتگ کہ بلوچ اسٹوڈنٹس ایکشن کمیٹی ءِ نیمگ ءَ نوکیں سال ءِ بندات ءِ درگت ءَبلوچستان کتاب کاروان ءِ نام ءَ بندات کرتگیں اے تکشام ھژدھمی روچ ءَ ھم بلوچستانءِ جتائیں ھنداں برجاہ بیتگ۔ بلوچستان کتاب کاروان ءِ میڑہ ءَ مرچی ڈالبندین، ھاران، کلات، منگچر، بل نگور ءُ ھب ءَ اسٹال جنگ بیتگ ۔بلوچستان ءِ جتائیں شھراں بیتگیں کتاب میڑھانی چہ پولیس ءُ انتزامیہ ءِ نیمگ ءَ یکشلءَ ھلاس کنگ ءُھمبلانی ترسینگ ءَ ابید بچک ءُ جنکیں نودربراں ھوار آدگہ مردم بازیں کچ ءَ اتکگ ءُزانت ءُ کتاب دوستی اِش پیش داشتگ۔
آئی ءَ گوشتگ کہ بلوچستان کتاب کاروان بلوچستانءَ کتاب دوستی ءُ پہ زانتءُ زانشت ءَ چاگردے ءِ ودی کنگ ءَ جھدانی درچ اِنت کہ چہ گل ءِ نیمگ ءَ گوستگیں چنچو سال اِنت برجاہ اِنت۔ جنوری ءِ بندات ءَ اے تکشام بندات کنگ بیتگ کہ بلوچستانءِ جتائیں ھنداں برجاہ بیت اے رد ءَ دشت، بلیدہ، ھوشاپ، جھل مگسی،ڈالبندین، سوراب، ھب ءُ پنجگور ءَ برجم دارگ بیت۔
