بلوچ نیشنل موومنٹ ءِ کارگشاد دل مراد بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ سمی دین ءِ سر ءَ ارش کنگ ءِ جھد ھمے گپ ءِ تچکیں منانک اِنت کہ پاکستان ھر وڑ ءَ مردمانی سر ءَ تُرس ءَ برجاہ دارگ ءِ جھد ءَ کنت بلے پاکستان چہ اے راستی ءَ شموشکار اِنت کہ وھدے لشکری زور ءُ چہ زوراکیاں برجاہ بیتگیں تُرس ءِ دیم پہ دیمی کنگ زندگیں راج ءِ گْوستانکی باسمائی،گوں وتی ھاک ءَ مھر ءُ چہ راجی ربیتاں بیت گڑا ترس پہ مدامی پروش وارت ھاٹیگ ءُ توکل سوبمندبنت۔
دل مراد ءَ گوششتگ کہ چہ ھپتاد سالاں ایردست ءُ لٹ ءُ پل ءِ ھش ءَ دُرشگ بیتگیں بلوچ راج مرچی گوستانک ءِ ھنچیں جاھے ءَ سر بیتگ کہ اود ءَ بچک ءُ جنکانی زندگی ءِ بزانت ھم مٹ بیتگ۔ مرچی بلوچ سرڈگار ءِ سر ءَ زندگی ءِ بزانت پہ وتی راج ءَ زندگ بیگ ءُ مرگ ءِ بزانت پہ راج ءَ مِرگ اِنت۔ اے باسمائی ءُ دیمونی ءِ جوزگ اے راج ءَ ھستمان ءُ آجوئی ءِ واھگ ءِ گْوچن ءِ مٹ کنگ ءِ بنیادی شون ءَ دیگ ءَ اِنت۔
آئی ءَ گوشتگ کہ سمی دین جان ءِ ھاٹیگ، مھکمی، شیرزالی ءُ یکشلیں جھد ءِ زندگیں چیدگ اِنت ءُراج آئی ءِ سر ءَ ناز کنت۔ پاکستان جھانی راجدپتر ءَ بوان ایت جاھے راجی چیدگ ءِ ھلاس کنگ ءِ جھد کنگ بیت گڑا اود ءَ سرجمیں راج سمی بیت ءُ گھگیری کنت، جھد ءَ ھوار بیت ءُ گڈی منزل ءَ سر بیت ءُ گڑا دم کنت۔
