بلوچ راجی سروک ءُ بلوچ نیشنل مومنٹ ءِ پیشگیں سرکماش ھلیل بلوچ ءَ وتی درشانی ءَ سائیں جی ایم سید ستک شانی ندر کُرتگ ءُ گْوشتگ کہ سائیں جی ایم سید سند ءِ آجوئی،زانت ءُ ایمنی ءِ چھر ءِ بستار ءَ مدام گیر آرگ بیت۔ 17 جنوری 1904 ءَ ودی بیتگیں اے ٹوھیں سروک ءَ وتی زندگی پہ سندی راج ءَ ندر کُرتگ۔واجہ سید ءِ مزنی بس یک سیاست زانتے ءِ نہ اِنت بلکیں یک دانشور، شھزانت ءُ راجدوستے بیتگ کہ آئی چہ وتی مزن پگری ءُ سیاسی زانت ءِ بنیاد ءَ نہ ایوک ءَ سند بلکیں سرجمیں دمگ سانمند کُرتگ۔آئی جتائیں بنگپاں درزنانی کچ ءَ کتاب نویشتگ، آئی ءِ پگر ءُ زانت پہ سندی ورنایاں رُژنائیں مینارے۔
آئی ءَ گْوشتگ کہ جی ایم سید ءَ سند سرڈگار ءِ آجوئی ءِ واھگ وتی زندگی ءِ مول ءُ مُراد جوڑ کُرتگ۔آئی مدام سندی راج گْوستانکی،دود ءُ ربیدگی ءُ سیاست ءِ سرپد کنگ ءِ بابت ءَ باز جُھد کُرتگ۔ واجہ سید ءِ نِز ءَ آجوئی ایوک ءَ زمین ءِ گرگ نہ اِنت بلکیں پہ آجوئی ءُ وتواکی ءَ راجے ءِ جوڑ کنگ،کہ اود ءَ انساپ،برابری ءُ مردمگری بہ بیت۔آئی مدام گْوشتگ کہ سند سرڈگار ءِ آجوئی ءَ ابید سندی راج ءِ پجار،زان،دود ءُ ربیدگ پشت نہ کپ اَنت۔
آئی ءَ گْوشتگ کہ جی ایم سید ءِ مھکمی ءُ راھبندی سیاست آئی ءَ چہ آدگراں مستِر کنت۔آئی ءَ گْوشتگ کہ جُھد ءِ راہ مشکل اِنت بلے راھی وتی راھبندانی سر ءَ بہ اوشت ایت گڑا سوبمندی آئی ءِ پداں چُک ایت۔واجہ سید ءِ زندگی آئی ءِ آشوبی واھگانی گواہ اِنت کہ آئی سند ءِ نوکیں پدریچ ءِ دلاں زندگ کُرتگ۔
بلوچ سروک ءَ گْوشتگ کہ مرچی جی ایم سید ءِ سالروچ ءِ درگت ءَ من آئی ءَ ستک شانی ندر کناں ءُ ھمے اوست ءَ داراں کہ پہ سند ءِ آجوئی ءَ سندی راج آئی ءِ واھگاں آسر کنت۔آئی ءِ جُھد نہ ایوک ءَ پہ ما یک درورے بلکیں یک راھشونی ءِ راھبندے ھم کہ واھگانی آسر کنگ ءَ دیمونی،راھبندانی پاسداری ءُ وت ماں وتیں ھم سنتی ءَ بوت کنت۔واجہ سید ءِ پُشپد پہ سند ءَ رُژنائیں کشکے کہ چہ ھمیشے ءِ رُژنائی ءَ سندی راج پہ وتی منزل ءِ نیمگ ءَ رھادگ اِنت۔
