شال: پہ زوربیگواھیں مردمانی پد جنگ ءَ وی بی ایم پی ءِ برجاھیں زھرشانی گدان ءَ 5701 روچ سرجم بوتگ۔ چہ کلات ءَ سیاسی ءُ چاگردی کارکن ھاجی جما ھان نیچاری، دل مراد جتک،شاہ بیگ ءُ آدگہ مردم پہ زوربیگواھیں مردمانی کھولاں ھمدردی درشان کنگ ءَ گدان ءَ آتکگ اَنت۔
وی بی ایم پی ءِ کمک سرکماش ماما کدیر بلوچ ءَ گوں مردماں تران کرتگ ءُ گوشتگ کہ بلوچستان ءِ جاوراں بلوچ چاگرد سانمند کرتگ۔ ھزارانی کچ ءَ مردم پاکستانی لشکر ءَ آوار جتگ ءُ بیگواہ کرتگ۔ زوریں بیگواھی ءِ ھلاسی چاگرد ءِ جنجلاں ھلاس کنت پمشکا اے زوریں بیگواھی زوت دارگ لوٹ ایت۔
آئی گوشتگ کہ بلوچ راج ءَ یکجاہ بوگ ءُ پہ انسانی ھکانی لگتمالی ءَ جھد کنگی اِنت۔ دانکہ ما یکجاہ نہ بوتگیں بلوچستان ءَ انسانی ھکانی لگتمالی ءِ جاورانی دارگ ءَ سوبین نہ بہ ایں۔
